Çka ndodhi në takimin mes Albin Kurtit dhe Richard Grenell – Flasin nga Vetëvendosje

Në Ambasadën e re të ShBA-ve në Prishtinë, sot janë takuar Albin Kurti dhe Ambasadori Amerikan në Gjermani, Richard Grenell.

Sipas një njoftimi nga Lëvizja Vetëvendosje, Grenell ka kërkuar të dijë qëndrimin e Kurtit rreth mundësisë së një marrëveshje me Serbinë.

Ai madje sipas VV-së, ka theksuar që mungesa e marrëveshjes së Kosovës me Serbinë është pengesa kryesore e investimeve të huaja në ekonominë kosovare.

“Kurti shprehu falënderimin e tij për rolin dhe mbështetjen e ShBA-ve për Kosovën si në luftë ashtu në paqe dhe gatishmërinë e tij që si kryeministër i ri i Kosovës të thellojë bashkëpunimin me ShBA-të. Ai u pajtua me Ambasadorin Grenell që Kosova ka nevojë për zhvillim ekonomik dhe investime prej jashtë, por për këtë gjë problem janë sidomos korrupsioni i lartë në qeveri që krijon pasiguri e cila tremb bizneset, varfëria e përhapur në popullsi që e mban të ulët kërkesën agregate si dhe qasja e vështirë në financa për bizneset për shkak të kamatave të larta të kredive në banka”.

“Sa i përket dialogut me Serbinë, z. Kurti tha që përmbajtja dhe procesi i marrëveshjes janë më të rëndësishme për qëndrueshmërinë e saj sesa afati kohor për të”, thuhet në njoftim.

Në fund të këtij takimi të thuhet se bashkëbiseduesit u pajtuan që sa më shpejtë të krijohet qeveria e re në Kosovë dhe se do të vazhdojnë komunikimin e shpeshtë e të rregullt.