Daçiq: Notë proteste Interpolit për kërkesat e fletarresteve ndaj Dodikut dhe Stevandiqit

Ministri i Punëve të Brendshme të Serbisë në mandat teknik, Ivica Daçiq, deklaroi se fletarrestet ndërkombëtare kundër Millorad Dodikut dhe Nenad Stevandiqit ende nuk kanë kaluar kontrollin e Sekretariatit të Përgjithshëm të Interpolit për përmbushjen e kushteve për publikim dhe se nuk përbëjnë bazë për veprim.

Ai tha se, duke pasur parasysh që bëhet fjalë për shtetas të Serbisë, Interpoli në Beograd i ka dërguar Sekretariatit të Përgjithshëm të Interpolit një notë proteste, pasi në kërkesat për shpalljen e fletarresteve ndërkombëtare “është shkelur neni 3 i Statutit të Interpolit”, i cili përcakton se “çdo aktivitet ose ndërhyrje në çështje apo raste me sfond politik, ushtarak, fetar ose racor është rreptësisht e ndaluar në këtë Organizatë”.

Sekretariati i Përgjithshëm i Interpolit ka konfirmuar pranimin e protestës dhe ka deklaruar se do ta shqyrtojë atë, si dhe “se do të na informojë me kohë për rezultatet e shqyrtimit”, shtoi Daçiq.

Ai theksoi se Serbia është e përkushtuar në mbrojtjen e sovranitetit dhe të drejtave të qytetarëve të saj, duke e konsideruar mbrojtjen e çdo individi si bazë të detyrimeve ndërkombëtare.

Daçiç tha se Serbia gjithmonë angazhohet për respektimin e normave ndërkombëtare, por se “në të njëjtën kohë nuk do të lejojë asnjë përpjekje për të cenuar të drejtat e qytetarëve tanë nga shtete të tjera ose nga organe ndërkombëtare”.

Gjykata e Bosnjë Hercegovinës konfirmoi të enjten se ka pranuar propozimin e Prokurorisë së Shtetit për shpalljen e fletarrestit ndërkombëtar për Millorad Dodikun dhe Nenad Stevandiqin, të cilët akuzohen për veprën penale “sulm ndaj rendit kushtetues”.

Shpallja e fletarrestit ndërkombëtar është në kompetencën e Zyrës Qendrore Kombëtare (NCB) të Interpolit.