Daçiq: Sot ditë turpi për Asamblenë Parlamentare të KiE-së

Ministri i Jashtëm i Serbisë, Ivica Daçiq, ka reaguar pasi Asambleja Parlamentare e Këshillit të Evropës ka miratuar me shumicë votash raportin e raportueses Dora Bakoyannis për anëtarësimin e Kosovës në Këshill.

Daçiq ka thënë se “është ditë turpi për Asamblenë Parlamentare”.

“Sot është një ditë turpi në Asamblenë Parlamentare të Këshillit të Evropës. Për herë të parë në histori, është rekomanduar anëtarësimi i diçkaje që nuk është shtet dhe nuk i plotëson kërkesat bazë në fushën e të drejtave dhe të lirive të njeriut. Është rekomanduar, ndonëse është refuzuar formimi i AKS-së për 11 vjet”, ka thënë Daçiq, raporton “RTS”.

Ai ka thënë se Serbia “do të vazhdojë të luftojë me gjitha forcat”.

Hapi i radhës dhe i fundit i anëtarësimit të Kosovës në KiE do të jetë votimi në Komitetin e Ministrave më 16 maj.

“Do të shohim vlerën e fjalës së bashkësisë ndërkombëtare që i dha presidentit Aleksandar Vuçiq se Kosova nuk do të pranohet në Këshillin e Evropës derisa ta formojë AKS-në”, tha Daçiq.