Deklarohet sërish profesoresha që u sulmua nga gjinekologu Arsim Gashi

Gjatë ditës së martë profesoresha e Fakultetit të Mjekësisë Hatixhe Latifi-Pupovci u sulmua nga gjinekologu Arsim Gashi. Krejt situata ndodhi si pasojë e një provimi që Pupovci e kishte mbajtur me studentët e lëndës së saj.

E në këtë provim nuk kishte arritur që të kalojë djali i gjinekologut kosovar Arsim Gashi.

Pak orë pas sulmit u deklaruar për të dytën herë profesoresha Hatixhe Latifi-Pupovci.

Ajo ka thënë se nuk ka dhunë që e sprapsë nga parimet e saj dhe se nota e lëndës së Fiziologjisë të cilën e ligjëron ajo, nuk do të merret pa meritë qoftë edhe nga fëmijët e kolegëve të saj mjekë.

“Ju falënderoj shumë për përkrahjen morale që po me jepni me reagimet e juaja ndaj një gjesti të shëmtuar e qyqar! Nuk ka dhunë që më sprapsë nga parimet e mia, as grushti e as plumbi! Nota e Fiziologjisë nuk do të merret pa u merituar nga askush e as nga fëmijët e kolegëve të mi. Me dorën time nuk nënshkruaj mbytjen e fëmijës tim e fëmijës tuaj ‘nesër’”, ka shkruar Latifi-Pupovci.

Ajo u sulmua dje nga gjinekologu Gashi pasi e kishte rrëzuar nga provimi djalin e tij. Gashi është shoqëruar dje në Policinë e Kosovës.