Deliu e Haxhiu “përplasen pa zë” në Kuvend, Konjufca: Blertë, le mos e tepro allahile

Deputetja e PDK-së, Blerta Deliu-Kodra, tha në Kuvend se vëllai i Ministres së Drejtësisë, Albulena Haxhiut, është i akuzuar për terrorizëm në Maqedoni. Këtë deklaratë Deliu e bëri pasi Haxhiu i tha se dhëndrri i saj është arrestuar në OSHP.

Deliu më pas e akuzoi ministren për shpifje dhe i tha se do të mbajë përgjegjësi për fjalën e saj, njofton Klankosova.tv.

“Një ministre që vjen sot këtu dhe lëshohet në akuza dhe shpifje të pavërteta e që kunatin e saj e ka të akuzuar për terrorizëm në Maqedoni. Imagjinojeni ministrja e Drejtësisë që sot vjen dhe më flet për sistem të drejtësisë në Kosovë e kunati i saj është i akuzuar për terrorizëm në Maqedoni sot mu më jep e më mban leksione për sistem të drejtësisë. Si takoheni ju me homologë nga Gjermania ose vende të tjera zonja ministre kur në CV-në tënde shkruan që kunatin e keni të arrestuar për terrorizëm në Maqedoni?. Sa për dhëndrrin as nuk është arrestuar dhe është shpifje që ju e keni thënë dhe do të mbani përgjegjësi për fjalën tuaj zonja Haxhiu”.

Pas kësaj deklarate, Deliu-Kodra ka dalë nga salla e Kuvendit, kur edhe i është kundërpërgjigjur ministrja Haxhiu duke thënë se ‘ndoshta Blerta e di si ka ndodhur rasti i Kumanovës’.

“Blerta Deliu kur bën akuza të tilla duhet të rri në Kuvend, e jo të ikë nga Kuvendi, është dashtë me qëndru. Për rastin e Kumanovës, le ta vlerësojnë institucionet e drejtësisë se është një enigmë e madhe sesi ka ndodhur ai rast. Ndoshta Blerta Deliu e di, le të tregoj ajo sesi ka ndodhur rasti i Kumanovës, është shumë me rëndësi për Republikën e Kosovës, shtetasit tanë që i kemi në Maqedoni ta dinë se çka ka ndodhur me ta”.

Menjëherë pas kësaj deklarate të Ministres së Drejtësisë, Deliu kërkoi fjalën gjë që nuk ia mundësoi kryetari i kuvendit të Kosovës, Glauk Konjuca.

“Blertë le mos e tepro allahile, jo bre se nuk ka kuptim për besë. Ka hapësira tjera se qysh ju mund ta shpjegoni veten deputete. Për besë është shkelje brutale e rregullores, s’është fer”.

Pas fjalës së Konjufcës, Deliu e Haxhiu janë ‘përplasur pa zë’ në sallën e Kuvendit.