Eduard Ibrahimi është shpallur fajtor dhe është dënuar me dënim unik prej 22 vite burgim, për vrasjen e 17-vjeçarit, Lekë Bulliqi, në vitin 2020, në Prishtinë.
Ibrahimi po akuzohet se më 12 mars 2020 e ka privuar nga jeta të miturin, dhe me atë rast me dashje ka vënë në rrezik jetën e R.G. dhe B.S.
Ndërsa, Përparim Ibrahimi po akuzohet se e kishte ndihmuar të akuzuarin Eduard Ibrahimin për të fshehur armën me të cilën ky i fundit e kishte privuar nga jeta të ndjerin L.B. Kurse, Lirim Begolli po akuzohet se pasi dy të akuzuarit Ibrahimi dhe Matoshi kishin kryer veprën penale, i njëjti i kishte strehuar në shtëpinë e tij, raporton “Betimi për Drejtësi”.
Kurse, i akuzuari Egzon Matoshi në seancën e 20 majit 2021, e kishte pranuar fajësinë që e kishte ndihmuar të akuzuarin Eduard Ibrahimi që të kryejë vrasjen.
Fillimisht ndaj Ibrahimi për veprën penale “Vrasje e rëndë” u shqiptua dënim me burgim prej 21 vitesh ndërsa për armëmbajtje atij iu shqiptua dënimi më 1 vit e 6 muaj burgim.
Ndërsa dënimi unik për këto vepra u shqiptua me 22 vite burgim, në të cilin dënim do t’i llogaritet edhe koha e kaluar në paraburgim dhe të njëjtit i vazhdohet masa e paraburgimit deri në plotfuqishmërinë e këtij aktgjykimi.
