Deputeti Bajqinovci: Në këtë ditë nënshkruhet marrëveshja VV-LDK

Liderit të VV-së, Albin Kurti, i kanë mbetur edhe 11 ditë deri në përfundimin e afatit për formimin e qeverisë, pasi paraprakisht ai është nominuar për postin e kryeministrit nga presidenti i vendit, Hashim Thaçi.

Gjatë katër ditëve brenda afatit, nuk pati asnjë takim ndërmjet Albin Kurtit dhe Isa Mustafës, mirëpo njëri nga deputetët më të votuar të LVV-së, Mefail Bajqinovci, në një prononcim për gazetën “Bota sot” ka thënë se beson shumë që të dielën do të arrihet marrëveshja mes dy partive.

“Besoj shumë se të dielën do të arrihet marrëveshja. Ne i kemi dhënë ofertën LDK-së, që të marrin më shumë ministri”, është shprehur Bajqinovci.

Ai ka folur edhe për çështjen e kryetarit të Kuvendit, ku Glauk Konjufcën e konsideron të paprekshëm nga ajo pozitë në këtë situatë, teksa ka thënë se është joserioze nga LDK që ta kërkojë dorëheqjen e tij, kur vet e ka votuar.

“Qëndrimi i LVV-së është që Glauk Konjufca mbetet kryetar i parlamentit. Është jo serioze që vet LDK e ka votuar e tash të kërkohet dorëheqja e tij. LDK duhet të reflektoj që të formohet koalicioni i shpresës dhe t’i largojmë keqpërdoruesit nga pushteti”, tha ai.

Bajqinovci thotë se vetëm koalicioni VV-LDK do të sjellë perspektivë në Kosovë, pasi këtë e ka kërkuar vet populli.

“Kosova duhet të bëhet me Qeveri sa më shpejtë që të jetë e mundur. Suksesi i Kosovës, pritjet e qytetarëve, politika e jashtme dhe ajo me fqinjët si dhe reformat rrënjësore në vend, janë pashmangshëm të lidhura me jetësimin e koalicionit të fituesve të zgjedhjeve LVV dhe LDK. Këtë e do populli, këtë po e duan miqtë e Kosovës dhe kështu është rruga e ringritjes së perspektives së Kosovës”, theksoi deputeti Bajqinovci.