Dështon sërish konstituimi i Kuvendit të Kosovës

Kosova dështoi të konstituonte Kuvendin për të 18-ën herë. Ligjvënësit refuzuan për të 10-ën herë rresht që të formonin një komision për mbikëqyrjen e një votimi të fshehtë për kreun e ri të organit ligjvënës. Seanca e radhës do të vazhdojë të mërkurën e 21 Majit.

Lëvizja Vetëvendosje nuk ka arritur deri më tani që të marrë 61 votat e nevojshme për të konfirmuar Albulena Haxhiun në krye të parlamentit. Më 1 Maj, Avni Dehari, i cili është kryesuesi i seancave propozoi votim të fshehtë, por kjo refuzohet nga partitë e tjera. Çështja është dërguar në Gjykatën Kushtetuese të Kosovës nga partitë që në legjislaturën e kaluar ishin në opozitë.

Ato thonë se është jokushtetuese mënyra se si LVV-ja po tenton që kryeparlamentari të votohet përmes formës së fshehtë, dhe i kanë kërkuar Kushtetueses të marrë “një masë të përkohshme për ndalim të mbajtjes së seancave, derisa me prioritet ta trajtojë këtë lëndë dhe ta marrë një vendim”.

Deri më tani, deputetët kanë kaluar vetëm dy pika të axhendës së seancës konstituive: raportin e Komisionit të përkohshëm për verifikimin e mandateve dhe atë të betimit të deputetëve.

Por, procesi ka ngecur te pika e tretë: zgjedhja e kryeparlamentarit. Haxhiu e LVV-së konsiderohet si figurë përçarëse nga dy parti parlamentare: PDK-ja dhe AAK-ja.

Të enjten, Presidentja Vjosa Osmani takoi përfaqësues të parive politike, por nuk pati dakordësi për konstituimin e Kuvendit.