Dështuan në arrestimin e Rejhan Belës, IPK-ja rekomandon suspendimin e dy zyrtarëve policorë

Inspektorati policor ka rekomanduar suspendimin e dy zyrtarëve policorë në stacionin e policisë në Kaçanik, pasi që kishin dështuar në përfilljen e urdhëresës së gjykatës për arrestimin e Rejhan Belës, të dyshuarit për vrasjen e rreshterit Muhamed Lika.

Sipas komunikatës së IPK-së, zyrtarët policorë kanë pasur dijeni për urdhërarrestin e lëshuar nga gjykata, por nuk e kanë përfillur atë.

“Hetuesit e IPK-së, bazuar në kompetencat ligjore sipas detyrës zyrtare ka filluar të ndërmarrë veprime hetimore paraprake lidhur me veprimet policore për zbatimin e urdhëresës për arrestimin e personit R. B ((i dyshuar lidhur me rastin e vrasjes së rreshterit policor Muhamet Lika). Nga veprimet paraprake hetimore të ndërmarra dhe komunikimet zyrtare të pranuara, ekziston dyshimi i arsyeshëm se deri në këtë fazë të hetimit, dy zyrtarë policorë kanë dështuar në kryerjen e detyrave zyrtare dhe kanë treguar neglizhencë serioze në zbatimin e urdhëresës për arrestimin e personit të dyshuar R. B.

Nga informacioni i dokumentuar dhe i siguruar nga IPK-ja ekziston dyshimi se një toger policor në pozitën e shefit të sektorit të operativës, ka pasur dijeni për urdhëresën për arrest, por dyshohet se nuk ka ndërmarrë veprime konkrete operative për lokalizimin dhe kapjen e personit të kërkuar. Gjithashtu, bazuar në veprimet hetimore dyshohet se një rreshter policor i angazhuar në cilësinë e mbikëqyrësit në njësinë ndërlidhëse për gjykata, ka dështuar të raportojë me kohë dhe saktësi për urdhëresën për arrest si dhe dyshohet se nuk ka ndërmarrë hapat e nevojshëm për ekzekutimin e saj”, thuhet në komunikatën e IPK-së.

Sipas IPK-së, dështimi i zbatimit të vendimit të formës së prerë nga gjykata cenon besueshmërinë institucionale dhe përbën bazë për procedim disiplinor dhe hetim të mëtejmë administrativ dhe penal.