Detaje tronditëse për sulmin në Australi: autorët u trajnuan jashtë vendit

Autorët e sulmit terrorist në Bondi Beach, ku u vranë 15 persona gjatë një feste të Hanukës, kishin marrë trajnim të stilit ushtarak në Filipine vetëm një muaj përpara masakrës, sipas burimeve të sigurisë të cituara nga ABC Australia.

Sajid dhe Naveed Akram, babë e bir, udhëtuan drejt Filipineve në fillim të muajit nëntor, ku më pas u zhvendosën në jug të vendit dhe iu nënshtruan trajnimeve ushtarake, ka konfirmuar një zyrtar i lartë i kundërterrorizmit, duke folur në kushte anonimiteti për transmetuesin publik australian.

Sipas hetimeve, Naveed Akram, 24 vjeç, kishte prej kohësh lidhje me individë të njohur të rrjeteve pro–Shtetit Islamik (IS) në Australi, përfshirë predikuesin ekstremist Wisam Haddad dhe rekrutuesin e dënuar të të rinjve për ISIS-in, Youssef Uweinat, raporton ABC.

Përmes avokatit të tij, Haddad ka mohuar çdo përfshirje në sulmin e Bondi Beach.

Autoritetet po hetojnë tashmë lidhjet e dy autorëve me një rrjet xhihadist ndërkombëtar, pasi është konfirmuar se ata udhëtuan drejt Manilës më 1 nëntor, përpara se të shkonin në jug të Filipineve. Byroja e Imigracionit të Filipineve konfirmoi se destinacioni i deklaruar i tyre ishte qyteti Davao.

“Autorët u larguan nga vendi më 28 nëntor 2025, përmes një fluturimi lidhës nga Davao në Manila, me Sidnein si destinacion përfundimtar”, deklaroi për ABC zëdhënësja e Byrosë së Imigracionit, Dana Sandoval.

Sipas saj, Sajid Akram hyri në Filipine me pasaportë indiane, ndërsa djali i tij, Naveed Akram, përdori pasaportë australiane. Davao ndodhet në ishullin Mindanao, një zonë e njohur prej dekadash si vatër e grupeve militante islamiste.