Distria Krasniqi – e teta në Ballkan, e dyta prej sportisteve

Një tjetër sukses madhor i Distria Krasniqit është regjistruar të hënën. Në konkurrencë me yje të sportit botëror, Distria është renditur e teta prej sportistëve më të mirë të Ballkanit.

Nëse për bazë merren vetëm sportistet, Distria është e dyta.

Vendet e Ballkanit janë të njohura për numrin e madh të sportistëve të nivelit më të lartë botëror. Dhe Distria e xhudistët e tjerë elitarë të Kosovës janë në mesin e tyre.

Është Agjencia Bullgare e Lajmeve, BTA, që tradicionalisht shpall sportistët më të mirë të regjionit të Ballkanit. Derisa dhjetëshja e parë për vitin 2025 ishte publikuar më herët, të hënën u shpallën e u shpërblyen më të mirët.

 

Notari rumun, David Popovici, është shpallur Sportisti më i Mirë i Ballkanit për vitin 2025.

Popovici gjatë vitit të kaluar ishte kampion i botës në stil të lirë në 100 e 200 metra. Ai mori 70 pikë në përzgjedhje.

Nikola Jokiq i Serbisë, që bënë karrierë të suksesshme në NBA, u vlerësua sportisti i dytë më i mirë i Ballkanit. I treti ishte Karlos Nasar, peshëngritës i suksesshëm i Bullgarisë. Pasojnë Giannis Antetokounmpo, basketbollisti yll i NBA-së që përfaqëson Greqinë, skitarja kroate, Zrinka Lutiq, atleti grek Emmanouil Karalis, ylli turk i NBA-së, Alperen Sengun, Distria Krasniqi, volejbollisti bullgar, Aleksandar Nikolov dhe Stefanos Ntouskos, varkëtar nga Greqia.

Pikë morën edhe top-sportistë të tjerë nga vendet e Ballkanit, por pa zënë vend në dhjetëshe.

Lara Colturi, skitarja që përfaqëson Shqipërinë, ishte e 15-ta në renditje.

Për më të mirët e Ballkanit kanë votur agjenci të lajmeve nga Bullgaria, Greqia, Rumania, Turqia, Mali i Zi, Maqedonia e Veriut, Kroacia, Bosnjë-Hercegovina, Qipro, Kosova, Shqipëria dhe Serbia. Nga Kosova votoi “KosovaPress”.

Në bazë të sukseseve kulmore gjatë vitit të kaluar, titullit të Evropës dhe medaljes së argjendtë botërore, Distria ndoshta ka mundur të jetë edhe për pak pozita më lartë. Por, natyrisht kanë ndikuar edhe aleancat e ndryshme me rastin e votimit.

Edhe vendi i tetë në një regjion të njohur për sport kulmor dhe në konkurrencë me yje të sportit botëror, është sukses i madh për Distrinë, trajnerin e saj, kryemjeshtrin Driton Kuka, dhe xhudon kosovare në përgjithësi.

Mirënjohja për Distrinë është ndarë të hënën. Atë e kanë pranuar përfaqësues të Ambasadës së Kosovës në Sofje.

Distria Krasniqi është më e ranguara në botë prej të gjithë xhudistëve dhe xhudisteve. Tashmë llogaritet edhe prej xhudisteve më të mira në histori. Në Kosovë ka disa vjet që shpallet më e mira. Ishte bindshëm më e mira edhe gjatë vitit të kaluar.