Ish-aktivistja e LDK-së në Gjermani Donika Gërvalla-Schwarz, ka reaguar pasi Albin Kurti edhe zyrtarisht është zgjedhur kryeministër i Kosovës.
Ajo në një shkrim në Facebook, thotë se nga qeveria e re nuk pret t’i përmbushin të gjitha premtimet, as nuk pret që për pak kohë terrin ta kthen në dritë, mirëpo ajo thotë se pret mos të na mashtroni, vidhni dhe shantazhoni si paraardhësit.
Ja shkrimi i saj:
Sot është një ditë e mirë për Kosovën sepse tani mund të fillojë puna.
Nuk presim nga ju të përmbushni të gjitha premtimet, as nuk presim që për pak kohë terrin ta ktheni në dritë. Po ashtu nuk presim nga ju që në këtë mandat tuajin të krijoni vende pune për të gjithë, shkolla si në Finlandë apo spitale si në Zvicër. Jemi të ndërgjegjshëm që do të bëni edhe gabime, të cilat do të mund të falen.
Nga ju presim seriozitet, integritet, punë dhe transparencë. Presim që të mos hezitoni të merrni vendime të rënda por shumë të rëndësishme për vendin edhe nëse ato shumëkujt nuk do t’i pëlqejnë.
Presim mos të na mashtroni, vidhni dhe shantazhoni si paraardhësit tuaj. Në rast të kundërt zemërimi do të jetë edhe më i madh.
Punë të mbarë!
