“E vrava se…”- Dëshmitë dhe pistat për vrasjen në Peqin. Skaneri jashtë funksionit

Pas ngjarjes së rëndë të ndodhur të premten në burgun e sigurisë së lartë në Peqin ku mbeti i vrarë një prej të dënuarve dhe u plagos një tjetër, dyshime janë hedhur edhe mbi zinxhirin komandues të këtij institucioni.

Me urdhër të prokurorisë janë arrestuar 12 punonjës, mes tyre drejtori i bugut të Peqinit Kamber Hoxha, shefi i policisë, shefi i regjimit si dhe 9 punonjës të tjerë policie nën akuzën e shëpërdorimit të detyrës.

Këto lëvizje të prokurorisë jusifikikohen me dyshimet se arma e përdorur nga i dënuari me burgim të përjetshëm Sokol Mjaçaj, me të cilën kreu ekzekutimin e Arben Lleshajt, mund të jetë futur dorazi në ambientet e burgut në bashkëpunim me punonjës të policisë.

Armën e krimit autori tha se e ka siguruar rreth 1 muaj e gjysmë më parë, kohë kur skaneri mund të ketë qenë i prishur.

“Skaneri ka qenë i prishur për disa kohë dhe është rregualluar disa ditë më parë”, bëri me dije nga vendngjarja, gazetarja e Euronews Albania Ortenca Budlla.

Fillimisht u aluadua se arma u fut me anë të një droni, por duket se hetuesit e kanë rrëzuar si pistë.

Në dëshminë e tij Mjacaj ka deklaruar se ka pasur konflikte dhe debate me Lleshajn, pasi ky i fundit nuk e ka pranuar në sektor ndaj ka kryer dhe krimin.

Por hetuesit dyshojnë se vrasja është organizuar me pagesë për hakmarrje.

Mjaçaj vuan dënimin me burgim të përjetshëm pasi në korrik të vitit 2015 në fshatin Prekal të Dukagjinit grabiti dhe vrau dy turistë çekë.

Ndërsa viktima Arben Lleshi ishte i dënuar me 32 vite burg për një vrasje të kryer në Britaninë e Madhe. I plagosur si pasojë e këtij konflikti mbeti edhe i dënuari tjetër Indrit Shaqe.