Emiratet e Bashkuara Arabe kanë ndaluar dhe kanë shkatërruar të hënën një raketë balistike derisa Presidenti izraelit, Isaac Herzog, vizitoi këtë vend.
Ky është incidenti i tretë i tillë i ndodhur gjatë këtij muaji, sipas autoriteteve izraelite.
“Sulmi nuk shkaktoi asnjë humbje. Mbetjet e raketës balistike ranë jashtë zonave të banuara”, njoftoi Ministria e Mbrojtjes e Emirateve të Bashkuara Arabe në Twitter.
Ky sulm vjen pas një sërë sulmesh në Emiratet e Bashkuara Arabe këtë muaj nga grupi Houthi i mbështetur nga Irani në Jemen, raporton CNN.
Një sulm me dron ndodhi më 17 janar, ku mbetën të vdekur tre punëtorë të huaj në kryeqytetin e Emirateve të Bashkuara Arabe, Abu Dhabi.
I njëjti grup dyshohet se lëshoi raketa sërish më 24 janar, por Emiratet e Bashkuara Arabe arritën t’i ndalonin ato me mbështetjen e Shteteve të Bashkuara. Pas atij sulmi, një zëdhënës i Houthi paralajmëroi se grupi do të “zgjeronte operacionet e tyre gjatë fazës tjetër” dhe paralajmëroi kompanitë e huaja që të largoheshin nga Emiratet e Bashkuara Arabe.
Sulmi i së hënës ndodhi gjatë vizitës së parë të presidentit izraelit në Emiratet e Bashkuara Arabe.
Presidenti dhe shoqëruesi i tij nuk ishin në rrezik dhe vizita pritet të vazhdojë siç ishte planifikuar, tha një zëdhënës presidencial izraelit.
