Edhe Haradinaj ia huqi, madje tha se kanë punuar intensivisht për njohjen nga Xhamajka

Ministrja e Punëve të Jashtme të Xhamajkës, Kamina J Smith, e ka mohuar se vendi i saj ka njohur Kosovën, ajo është përgjigjur në njoftimin e Presidentit Thaçi ku ai kishte njoftuar për këtë lajm.

Në një postim ne Twitter, duke shpërndarë deklaratën e presidentit të Kosovës Hashim Thaçi, i cili e ka falënderuar Xhamajkën për njohje, Kamina J Smith ka shkruar se vendi i saj nuk e ka njohur Kosovën.

E në mesin e liderëve që ia huqi me njohjen nga Xhamajka ishte edhe ish-kryeministri Ramush Haradinaj, i cili madje tha se kanë punuar shumë që Kosova të njihet nga ky shtet.

I ftuar mbrëmë në emisionin ‘Zona B’ të Klan Kosovës, kishte thënë se për njohjen e ardhur nga Xhamajka kishte punuar në mënyrë intensive. Madje Haradinaj thoshte se pritet të vijnë edhe dy apo tri njohje tjera nga shtete të mëdha, por që nuk dëshiron t’i zbulojë shkaku i Serbisë.

“Kjo njohja që ka ardhë sot nga Xhamajka, qysh janë edhe nja 2-3 njohje tjera qe kem punu intensivisht me ardhë, do të vijnë. Pra njohja e Xhamajkës sot, edhe njohjet e 2-3 vendeve shumë të mëdha , po skem guxu me ardhë. Po nuk flasim para se me ardhë për shkak të ndërhyrjes së Serbisë, janë punu me vite”, ka thënë Haradinaj.

Por gjithë këtë entuziazmim të Haradinaj dhe liderëve të tjerë kosovarë e zbehu sot ministrja e Punëve të Jashtme të Xhamajkës, e cila tha se kjo nuk është e vërtetë.

Mbetet të shihet se cili do të jetë epilogu dhe fundi i kësaj ‘njohje nga Xhamajka’./