Gjendja e krijuar mes Kosovës dhe Serbisë, sipas analistit amerikan Charles Kupchan, është serioze dhe ekziston rreziku për dhunë dhe bllokim të mëtejshëm.
Sipas studiuesit të Këshillit amerikan për marrëdhënie me Jashtë, Shtetet e Bashkuara të Amerikës dhe Bashkimi Evropian kanë të drejtë që janë të shqetësuar pas mos-arritjes së një marrëveshjeje në mes të Kosovës dhe Serbisë të hënën në Bruksel, por shtoi se trysnia duhet të mbahet ndaj të dyja palëve.
“Situata është mjaft e tensionuar tani, në kuptimin që kemi arritur në një ngërç dhe qeveria e Kosovës ka rënë dakord për një shtyrje vetëm 48 orëshe dhe ekziston mundësia që të rikthehemi në një pikë ku ringjallet rreziku për dhunë”, ka thënë Kupchan për Zërin e Amerikës duke iu referuar shtyrjes që qeveria e Kosovës pranoi për zbatimin e vendosjes së gjobave për targat e makinave në Veri, pas kërkesës së Shteteve të Bashkuara.
Sipas ekspertit amerikan kryeministri i Kosovës, Albin Kurti po përdorë çështjen e targave si një mënyrë për ta detyruar Serbinë që të merret me çështjet më madhore në kuadër të dialogut.
“Mendoj që ShBA-të dhe BE-ja duhet të bëjnë trysni ndaj të dyja palëve dhe mesazhi ndaj Beogradit duhet të jetë që të angazhohet në një dialog të sinqertë me Kosovën për normalizim dhe rrjedhimisht njohje të saj. Nga ana tjetër mendoj se duke pasur parasysh mundësinë e dhunës, duke qenë se situata është e rrezikshme, trysnia ndaj Kosovës është e kuptueshme, meqenëse vazhdimi i planit për zbatimin e vendimit për targat e makinave, mund të trondiste status-quonë”, tha ai.
