Emigrantët shqiptarë “thyejnë” murin e Texas-it, kapen nga Policia amerikane

Më shumë se 150 emigrantë, përfshirë shqiptarë dhe më shumë se një duzinë rumunë, kaluan ilegalisht kufirin për në SHBA të shtunën në mëngjes.

Sipas korrespondentit të agjencisë së lajmeve amerikane “Fox News”, Bill Melugin – i cili ishte në vendngjarje ndërsa agjentët e patrullës kufitare punonin për të kapur emigrantët që kaluan – grupi, i cili përfshinte të mitur, hyri në një vend në La Joya, Texas, pasi bëri udhëtimin nëpër Rio Grande.

Melugin raportoi se “pjesa kryesore” e emigrantëve që hynë ilegalisht në mëngjesin e së shtunës ishin nga Amerika e Jugut, por vuri në dukje se migrantët nga një sërë zonash ishin gjithashtu të përfshirë në grup.

Melugin tha gjithashtu se priten të mbërrijnë më shumë emigrantë.

Një imazh i shpërndarë nga Melugin në kufi zbuloi se emigrantët anashkaluan një mur kufitar jo të plotë që po ndërtohej nën administratën e ish-presidentit Trump.

Kur Presidenti Biden mori detyrën në janar, administrata e tij urdhëroi ndalimin e menjëhershëm të ndërtimit të një gardhi kufitar 30 këmbë të lartë, duke lënë një vrimë të hapur në një nga shtrirjet më të cenueshme të kufirit SHBA-Meksikë.

Ndalimi i ndërtimit rezultoi në shpërdorimin e materialeve të murit kufitar me vlerë më shumë se 100 milionë dollarë në Texas.

Melugin raportoi se ka mjaft çelik për mbi 100 milje muri kufitar, por vetëm rreth 14 milje u ndërtuan përpara se puna të ndalonte pasi administrata e ish-presidentit republikan Donald Trump la detyrën.

Ish-shefi i sigurisë kufitare të Biden, Rodney Scott tha në kohën e zbulimit të materialeve se SHBA-të po paguanin 5 milionë dollarë çdo ditë për kontratat kufitare që ishin në pritje.

Kjo do të thotë se nën Presidentin demokrat Biden, SHBA-të kanë paguar për ndërtime që nuk po përfundojnë.