Erdogan thotë se Izraeli po rrezikon ekzistencën dhe të ardhmen e vet

“Me çdo akt shtypjeje, çdo pikë gjaku të derdhur, çdo krim kundër njerëzimit, Izraeli po rrezikon gradualisht ekzistencën dhe të ardhmen e vet”.

Kështu ka thënë Presidenti turk Recep Tayyip Erdogan.

Erdogan paralajmëroi më herët se “Izraeli po kërkon ta tërheqë botën në një ‘katastrofë’ pas sulmeve të tij ndaj Iranit”.

Një kritik i ashpër i Izraelit dhe një mbrojtës i vendosur i kauzës palestineze, presidenti turk akuzoi Izraelin se po ndjek “një strategji që konsiston në mbytjen e rajonit tonë, veçanërisht Gazës, në gjak, lot dhe paqëndrueshmëri, në një fazë shumë të rrezikshme” pas një serie sulmesh ajrore ndaj Iranit.

“Sulmet e Izraelit kundër fqinjit tonë, Iranit, janë një provokim i dukshëm që nuk merr parasysh ligjin ndërkombëtar”, tha ai në X. “Bashkësia ndërkombëtare duhet t’i japë fund banditizmit izraelit që synon stabilitetin global dhe rajonal”, kërkoi ai.

Qeveria e kryeministrit izraelit Benjamin Netanyahu “po përpiqet për ta tërhequr rajonin tonë dhe të gjithë botën në katastrofë me veprimet e saj të pamatura, agresive dhe në kundërshtim me ligjin”, tha ai përsëri.

Izraeli ka nisur një sulm ndaj Iranit që synon “dhjetëra” objektiva, përfshirë objektet e tij bërthamore.

Kryeministri i Izraelit, Benjamin Netanyahu, tha se sulmi, i quajtur Rising Lion, do të zgjaste “shumë ditë” dhe kishte për qëllim “zvogëlimin e kërcënimit iranian ndaj mbijetesës së Izraelit”.

Ai sugjeroi se operacioni mund të jetë i gjatë dhe i vështirë, duke thënë se “qytetarët izraelitë mund të duhet të qëndrojnë në zona të mbrojtura për periudha të gjata kohore”.

Netanyahu tha se një objektiv ishte objekti bërthamor Natanz, një vend kyç për pasurimin e uraniumit.

Një zëdhënës ushtarak izraelit i tha Reuters se 100 dronë po shkonin drejt Izraelit dhe përpjekjet për t’i rrëzuar ato ishin duke u zhvilluar.

“Na presin disa orë të vështira”, tha zëdhënësi. Ministri izraelit i mbrojtjes, Israel Katz, njoftoi një “situatë të veçantë” në Izrael pasi vendi nisi sulmet dhe tha se Izraeli priste hakmarrje.

Aeroporti Ben Gurion i Tel Avivit u mbyll deri në njoftim të mëtejshëm dhe njësitë e mbrojtjes ajrore të Izraelit qëndruan në gatishmëri të lartë.

Komandanti i Gardës Revolucionare, Hossein Salami, është vrarë në sulme dhe selia e njësisë në Teheran është goditur.

Garda Revolucionare tha se Izraeli do të paguajë një çmim të lartë për sulmin e saj.

Sulmet izraelite vranë gjithashtu gjeneralin Mohammad Bagheri, shefin e shtabit të forcave të armatosura të Iranit, sipas raportimeve të televizionit shtetëror iranian.