Foto të Putinit dhe emblema serbe, mbyllen institucionet paralele në Mitrovicën e Veriut

Kosova vijon përpjekjet për të shtrirë sundimin e ligjit në veri të vendit. Autoritetet mbyllën këtë të enjte dy ndërmarrje publike të cilat vepronin sipas sistemit të Serbisë në Mitrovicën e Veriut. Konkretisht, Drejtoria për Hapësirën Banesore dhe Biznesore dhe Drejtoria për Tokën Ndërtimore.

Zyrat gjendeshin në një godinë banimi në Mitrovicën e Veriut. Në një deklaratë në rrjetet sociale, Ministri i Brendshëm i Kosovës, Xhelal Sveçla, tha se është mbyllur një institucion i cili në mënyrë të jashtëligjshme ka grumbulluar pagesa nga qytetarët dhe bizneset e shumta për shfrytëzimin e objekteve që janë kinse nën menaxhimin e tyre.

Në postimin e tij, Sveçla publikoi edhe një video e cila duket se shfaq një fotografi të Presidentit rus, Vladimir Putin, dhe emblema të shtetit serb brenda objektit.

“Ky keqpërdorim i realizuar nën flamujt e emblemat e Serbisë, përveç që është mbyllur sot, do të hetohet deri në fund”, tha Sveçla.

Ndërkohë, zv/drejtori i policisë për veriun, Veton Elshani, thotë për Radion Evropa e Lirë se ishte konstatuar së në këto ambjente punonin struktura ilegale dhe paralele, dhe se kanë nisur hetimet për falsifikim të dokumentave. Pas mbylljes së zyrave, reagoi Zyra për Kosovën në Qeverinë e Serbisë duke thënë se “po uzurpohen” institucionet e Serbisë në veri dhe se këto hapa janë “në kundërshtim me marrëveshjet”.

Ajo i ka bërë thirrje komunitetit ndërkombëtar në Kosovë të ndërmarrë masa të menjëhershme dhe “të parandalojë kryeministrin e Kosovës, Albin Kurtin, nga shkaktimi i konflikteve”.

Ndërkaq, Lista Serbe, partia më e madhe e serbëve në Kosovë, njoftoi se “hyrja” e autoriteteve të Kosovës në ndërmarrjet serbe nuk do të vërë në rrezik 70 punonjësit, dhe se ata do të vazhdojnë të marrin pagat e tyre.