Gashi: Kurti tash është ulur si pulë, dikur hapte krahët si skifter- Konjufca i kërkon të ketë kujdes me fjalorin

Shefi i Deputetëve të LDK-së, Arben Gashi ka thënë se kryeministri Kurti që dikur i hapte krahët si skifter ndërsa tash është ulur si pulë. Këto komente ai i bëri në seancën e Kuvendit teksa po diskutohet ratifikimi i dy marrëveshjeve ndërkombëtare. Pas kësaj, kryetari i Kuvendit, Glauk Konjufca i ka kërkuar atij që të ketë kujdes me fjalorin.

“Po ua kujtoj sot kryeministrit të sotshëm dhe ministrit të sotshëm të Financave, se si silleshin në këtë kuvend kur ne diskutonim Ligjin për Rimëkëmbje Ekonomike. Silleshin duke i hapur krahët si skifter dhe sot janë ulë aty si pula sepse e dinë se çfarë do të thotë të marrësh vendime në interes të shtetit”, ka thënë Gashi.

Pas kësaj, Konjufca i ka tërhequr vërejtjen deputeti të LDK-së.

“Kujdes fjalorin, Arben”, tha ai.

Por, shefi i GP të LDK-së tha se fjalët e tij s’janë hera e parë që degjohen duke aluduar në fjalimin e kryeministrit Kurti për “skifter dhe pulë” sa ishte deputet i Vetëvendosjes.

“A janë fjalë të dëgjuara edhe më herët në Kuvend zoti Konjufca”, tha Gashi.

Tutje, deputeti i LDK-së tha se partia e tij do t’i përkrah marrëveshjet për dallim nga Lëvizja Vetëvendosje që s’i kishte përkrahur sa ishin në opozitë.

“Të strukesh si pulë sot s’është gjë e keqe me rëndësi është të kuptosh rëndësinë e shtetit dhe pushtetit. Janë dy marrëveshje prej këtyre që janë të propozuara këtu që ne do t’i përkrahim. Është marrëveshja me Bankën Zhvillimore të Këshillit të Evropës për financimin e projektit për reagimin emergjen ndaj COVID-19, këtë lloj marrëveshje ju se përkrahnit sa ishit në opozitë vetëm po ua kujtoj. Ne nuk jemi si ju dhe jemi krenar që nuk jemi si ju, sepse interesi i shtetit është më i rëndësishëm. Poashtu ne japim përkrahjen për ratifikimin dhe amandamentin e dytë të marrëveshjes bilaterale dhe qeverisë së Dukatës së Madhe të Luksemburgut për projektin e bashkëpunimit të zhvillimit program dhe mbështetje shëndetësore pjesa e dytë. E japim përkrahjen sepse e kemi parasysh përgjegjësinë, sepse nuk shohim që duke e bllokuar një qeveri fitojmë politikisht, nuk është qëllimi ynë”, tha Gashi.