Gazeta kroate: Vuçiç si rrush i pavjelur, në qershor i zbarkojnë në Beograd Scholz dhe Lavrov

Problemet vetëm sa po shkojnë e po i rriten Presidentit të Serbisë, Aleksandër Vuçiç, shkruan e përditshmja kroate “Jutarnji list”.

“Në njërën anë paralajmërimet e Brukselit se nëse Serbia e ka përnjëmend anëtarësimin në BE duhet të harmonizohet me politikën e jashtme evropiane, dhe në anën tjetër sugjerimet që i vinë nga Moska se mbështetja rreth Kosovës mund të ndryshojë drastikisht, dhe për atë se kampi beogradas ka mjaft konkurrentë ndaj fronit të Vuçiçit”.

Kështu e përshkruan situatën politike të Aleksandër Vuçiç të cilit po i soset ambivalenca, e përditshmja kroate “Jutarnji list”.

“Vuk Jeremiç kohëve të fundit haptazi ia ofroi veten [Vladimir] Putinit. Vuçiç është rrush i pavjelur”, konstatohet në artikull.

“Në fillim të javës, Vuçiç u krekos se do të bisedonte me Putinin rreth dërgesave të gazit, por Kremlini njoftoi se Putin nuk e ka në agjendën e tij ndonjë bisedë me të. Pasi e dogjën flakë, Putin dhe Vuçiç u dëgjuan me njëri-tjetrin”.

Megjithatë, edhe pse “dëgjoi atë që donte të dëgjonte” nga Putini, Jutarnji thotë se “vuajtja e Vuçiçit nuk ka pushuar”.

“Në fillim të qershorit, ai pret dy vizita tejet të parehatshme, mbase edhe kyçe. Përkatësisht, më 10 qershor kancelari gjerman, Olaf Scholz, vjen në rajon (ku do të vizitojë Beogradin, Prishtinën, Shkupin dhe Sarajevën)”.

“Sidoqoftë, me t’u lajmëruar se kancelari gjerman po vinte, doli se dy ose tri ditë para tij, vizitori më i bezdisshëm në këto kohë, diplomati i parë i Putinit dhe një prej grabitçarëve më të mëdhenj të Kremlinit – Sergej Lavror, do të vinte”, shpjegon gazeta kroate.

Lavrov, sipas gazetës kroate, do të vijë me paralajmërimet shtesë të Putinit – me mesazhe e sugjerime se çfarë të flet Vuçiç me Scholz-in – “të paralajmëruar, kështu që kujdes çfarë zgjedhë të bësh”.