Ministri i Mbrojtjes, Armend Mehaj, ka konfirmuar se gjenerali amerikan Wesley Clark do ta vizitojë Kosovën shumë shpejt, por pa dhënë një afat të caktuar.
Mehaj këtë e bëri të ditur përmes një postimi në Facebook, ku njoftoi se ka zhvilluar një bisedë përmes video-lidhjes me gjeneralin amerikan.
‘’Gjeneralin Clark e ftova për vizitë në Ministrin e Mbrojtjes dhe FSK, të cilën ma konfirmoi me kënaqësi, vizitë kjo që do të realizohet së shpejti’’, njoftoi ministri.
Mehaj e konsideroi si nder dhe privilegj të madh bisedën me gjeneralin historik amerikan.
‘’Nder i madh dhe privilegj i veçantë të takohem me gjeneralin historik amerikan, Wesley Clark me të cilin biseduam si dy miq, përmes video-lidhjes, për rreth një orë. I thashë se ju jeni heroi i kombit dhe të gjithë qytetarëve liridashës të Kosovës dhe i tillë do të jeni gjithmonë. Gjeneral Clark më bëri nder të veçantë në jetë dhe karrierën time duke shprehur vullnetin e tij të plot për këshillim nga eksperienca e tij ushtarake dhe diplomatike, si dhe autoriteti i tij i jashtëzakonshëm në qendrat e vendimmarrjes botërore. Ai shprehu gatishmërinë e tij të plotë të mbështes me këshillimin e tij në realizimin e qëllimeve të mia strategjike dhe objektivave të mi operacional për zhvillimin e Ministrisë së Mbrojtjes dhe FSK-së’’, thuhet tutje në njoftim.
Në mbledhjen e sotme të Qeverisë, ku u votua rishikimi i buxhetit, ministri Mehaj ka kërkuar që të ndahen mjete edhe për blerjen e disa dronëve amerikanë.
“Përmes Ministrisë së Mbrojtjes, përmes analizës kemi nevoje për dronë për rritjen e inteligjencës e vëzhgim, Ministria ka bërë kërkesë për blerje të dronit, ne kemi pranuar letrën e ofertës kostoja për katër është 4.6 milionë dollarë ose 11.9 milionë euro. Pagesa e shumës mund të bëhet në dy këste, në 50 përqind të shumës duhet të bëhet në nënshkrimin e kontratës, pjesa tjetër duhet të bëhet deri në mars të 2022. Andaj kërkojmë që 4.5 milionë euro, sepse 1 milionë euro mund t’i sigurojmë si ministri. Oferta nga SHBA-të të vlejë deri më 26 qershor”, ka thënë Mehaj.
