Grabitësi i plagosur dërgohet në Emergjencë, gjendja e tij shëndetësore është e rëndë

Përveç pjesëtarit të kompanisë “Istambul Ozel Guvenlik”, i cili mbeti i plagosur sot në ballafaqimin me grabitësit e armatosur afër qendrës tregtare ‘Albi Mall’, është plagosur edhe njëri nga grabitësit. Me plagë në këmbë dhe në gjoks, i dyshuari ka kërkuar ndihmë në qendrën emergjente në Graçanicë, por tashmë është transportuar në QKUK.

Sinjali raportoi ekskluzivisht se bëhet fjalë për Millosh Vukojeviq, i cili është nga Leposaviqi.

Drejtori i Emergjencës në QKUK, Naser Syla ka deklaruar se gjendja e tij shëndetësorë është shumë e rëndë dhe është duke iu nënshtruar operimit.

Nga Policia e kanë konfirmuar rastin dhe kanë bërë me dije se janë duke i ndërmarrë masat e nevojshme.

“Sot rreth orës 10:30, kemi pranuar informatën për të shtëna me armë në lagjen Veternik në Prishtinë, ku është plagosur një person. Bazuar në të dhënat e deritanishme, rasti dyshohet se ka ndodhur gjatë një grabitjeje të armatosur ndaj pjesëtarëve që po siguronin një furgon që transportonte para.

Personi i lënduar është dërguar për tretman mjekësor ndërkohë që hetuesit policorë në koordinim me Prokurorinë, janë duke ndërmarrë të gjitha masat e nevojshme për identifikimin dhe arrestimin e të dyshuarve, si dhe për zbardhjen e plotë të rrethanave të rastit.”