Një gjykatë e lartë në Turqi vendosi të martën se vendimi i presidentit Recep Tayyip Erdogan për ta tërhequr vendin nga traktati kyç evropian për mbrojtjen e grave nga dhuna ishte i ligjshëm, duke refuzuar peticionet që kërkonin anulimin e tij.
Erdogani e tërhoqi Turqinë nga Konventa e Stambollit e Këshillit të Evropës vitin e kaluar, duke shkaktuar reagime nga grupet e të drejtave të grave dhe shtetet perëndimore. Konventa u nënshkrua në Stamboll më 2011, raportoi AP-ja.
Disa grupe të grave dhe organizata të tjera i kishin kërkuar Këshillit të Shtetit të anulohej vendimi i Erdoganit duke argumentuar se tërheqja nga traktati përmes një dekreti presidencial është e paligjshme.
Megjithatë, gjykatësit vendosën ta refuzonin kërkesat.
Vendimi i vitit të kaluar për t’u larguar nga konventa erdhi pasi disa zyrtarë nga partia e Erdoganit e orientuar kah islami kishin kërkuar rishikimin e marrëveshjes, duke thënë se nuk është në pajtueshmëri me vlerat konservatore të Turqisë me inkurajimin e divorcit dhe minimin e bashkësisë tradicionale të familjes. Kritikët pretendonin se promovonte edhe homoseksualitetin.
Erdogani insistoi se nuk do të ishte hap mbrapa për gratë dhe në mars Parlamenti turk ratifikoi një ligj me qëllimin për ta ndalur dhunën kundër grave që përfshiu dënime më të ashpra nëse viktima e krimit të dhunës është grua.
Të paktën 226 gra janë vrarë në Turqi deri tash gjatë 2022-s, dhe 425 vitin e kaluar.
