Haradinaj dyshon që situata me rrymën u krijua për të përfituar “mafia energjetike”

Kryetari i Aleancës për Ardhmërinë e Kosovës, Ramush Haradinaj, ka hedhur dyshime nëse situata me energjinë elektrike është shkaktuar për të përfituar “mafia energjetike”. Në një shkrim në Facebook, Haradinaj ka shtruar pyetjen nëse Qeveria dhe një pjesë e opozitës kanë interesa klienteliste.

Ai ka kritikuar kryeministrin Albin Kurti se vazhdimisht ka pasur qasje problematike për energjinë.

“Kur ishte në opozitë ka kundërshtuar ndërtimin e Kosovës së Re, me arsyetimin që do të dilte rryma më shtrenjtë, megjithëse çmimi i saj po rezulton se do të na dilte për disa herë më i lirë; Sapo ka ardhur në Qeveri, me arsye qesharake për të mos thënë banale e ka refuzuar gazin amerikan, që do të ishte një burim shtesë i prodhimit të energjisë; Ka shpenzuar dhjetëra milionë për pagesën e rrymës për qytetarët serbë në veri; Njëkohësisht ka vazhduar ta subvencionojë blerjen e rrymës me dhjetëra milionë të tjerë të taksapaguesve; Me gjithë këto shpenzime enorme të parasë publike, ai ka vendosur që ta shtrenjtojë energjinë për qytetarët në një masë të papërballueshme”, ka shkruar Haradinaj.

Teksa ka paralajmëruar protesta, Haradinaj ka thënë se qytetarët e kanë kuptuar se “çështja e energjisë mban erë”.

“Kam dashur të besoj se të gjitha këto veprime të palogjikshme të tij në raport me energjinë, kanë qenë rezultat i mungesës së dijes dhe përvojës së tij qeverisëse. Por kanë ndodhur aq shumë veprime skandaloze, sa që të krijohet bindja se të gjitha këto janë bërë me skenar për të shkaktuar një situatë të papërballueshme për qytetarin e shumë profitabile për ‘mafian energjetike’. Prandaj pyetja ime publike është, nëse të gjitha veprimet për energjinë, fshehin diçka më të madhe se sa mungesa e përvojës së Kryeministrit. A mos ka këtu interesa klienteliste të Qeverisë e të një pjese të Opozitës që po hesht” ka shkruar ai.

Rreth 31 për qind e konsumatorëve do të preken nga tarifat e reja të energjisë, të propozuara nga Zyra e Rregullatorit të Energjisë.

ZRRE-ja ditë më parë ka propozuar rikthimin e blloktarifave në faturat e qytetarëve.

Ndërkohë nga Qeveria kanë bërë të ditur se zotimi i tyre për subvencionim të 75 milionë eurove për të ndikuar në zbutjen e krizës ka mundësuar që konsumatorët që shpenzojnë më pak se 600 kilovatë të mos kenë rritje të çmimit.

Por nga ngritja e çmimeve do të preken rreth 200 mijë familje.