Haradinaj nuk tregon kriteret si u ndanë 70 mijë euro për 4 persona të ftuar nga Specialja

Ndarja e mjeteve financiare për pensionistët, veteranët dhe kategori të tjera, ka mbledhur kabinetin qeveritar tre muaj pas dorëheqjes së kryeministrit Ramush Haradinaj.

Ky i fundit nuk ka dhënë detaje se si është bërë ndarja e 70 mijë eurove nga buxheti i shtetit për 4 ish-eprorë të UÇK-së, të ftuar për intervistim nga Gjykata Speciale, raporton KTV.

KTV-ja ka raportuar javën e kaluar se këto mjete financiare ishin ndarë me dy vendime të ekzekutivit më 5 shkurt dhe 19 mars, siç shkruhet “përkrahje financiare për personat e akuzuar potencialë në proceset gjyqësore pranë Dhomave të Specializuara”.

Sami Lushtakut i janë ndarë 9,187 euro, ndërsa Mahir Hasanit 6,991 euro.

Qeveria e kishte mbështetur financiarisht edhe Sylejman Selimin me 13,822 euro.

Ndërsa, shuma prej 40 mijë eurosh, ishte ndarë për Lahi Brahimajn, dajë i kryeministrit në detyrë Ramush Haradinaj.

Ndërkaq, për arrestimet e mundshme nga Specialja, Haradinaj ka thënë se nuk ka informacione të tilla.

Në vitin 2015, Kosova ka miratuar Ligjin për mbështetjen financiare të individëve që akuzohen, por që në emër të ligjit dhe nenit 1, përfshin edhe fjalën ‘potencial’.

Pavarësisht kësaj, në dy nenet pasuese, atë 2 dhe 3, që i referohen fushëveprimit dhe mbrojtjes juridike, saktësohet se nga i njëjti, asistencë financiare përfitojnë vetëm të akuzuarit, e jo të dyshuarit apo dëshmitarët.

Për Qeverinë e ardhshme, Haradinaj ka thënë se do të ishte gabim kapital politik heqja e taksës dhe zëvendësimi e saj me reciprocitet.