Haradinaj: S’kam pasur komunikim me Limajn – ndarja nga opozita është një veprim i turpshëm

Kryetari i Aleancës për Ardhmërinë e Kosovës, Ramush Haradinaj e ka quajtur pozicionimin e kryetarit të Nismës Socialdemokrate, Fatmir Limaj, si “ndarje të turpshme”.

Haradinaj i cili në zgjedhjet parlamentare të 9 shkurtit garoi së bashku me Nismën Socialdemorkatare deklaroi se nuk ka pasur komunikim me Limajn që nga pozicionimi i tij, se do ta mbështesë qeverinë Kurti.

“Nuk kam pasur komunikim që nga intervista e fundit e famshme e zotit Limaj. Vetë fakti që ka qenë shumë e vështirë krijimi i shumicës nga opozita e ka bërë këtë proces të ndërlikuar, ndërsa pozicionimi i hershëm i tij e ka vështirësuar edhe më shumë”.

“Nëse Nisma dhe Limaj e mbështesin pushtetin, atëherë është e qartë që ndahen nga ne. Por është një ndarje mjaft e turpshme, pasi kemi kërkuar votën për ndryshim – dhe sjellja e tyre, veprimi i tyre, është mjaft i turpshëm”, tha Haradinaj para gazetarëve.

Ai para gazetarëve tha se në rast se dy partitë opozitare nuk e votojnë kryetarin e Kuvendit, as partia që udhëheq ai s’do ta votojë.

“Ne, në parim, votojmë kandidatin për kryetar të Kuvendit. Kuptohet se do të bëjmë konsultime të ndërsjella edhe me partitë opozitare – PDK-në dhe LDK-në – por besoj që konstituimi i Kuvendit është në interes të të gjithëve. Më pas, Aleanca do të angazhohet dhe do të punojë që qeverinë ta formojë opozita, në rast se pozita nuk arrin të krijojë shumicën”.