Haxhi Shala dhe Sabit Januzi pranojnë akuzën e frikësimit të një dëshmitari dhe pengimit

Haxhi Shala dhe Sabit Januzi kanë pranuar akuzën për frikësimit të një dëshmitari dhe pengimit në marrëveshje për pranimin e fajësisë me Zyrën e Prokurorit të Specializuar (ZPS), ka njoftuar kjo zyrë në një komunikatë për media.

Të pandehurit akuzohen për frikësim gjatë procedurave penale dhe pengim të personave zyrtarë në kryerjen e detyrave zyrtare.

Në një reagim lidhur me marrëveshjet, prokurorja e specializuar, Kimberly West ka thënë se arritja e marrëveshjes është “dëshmi e forcës së hetimeve tona lidhur me çështjet e frikësimit dhe pengimit të drejtësisë”.

“Ne e bëmë këtë pas një shqyrtimi të kujdesshëm që mori parasysh, midis të tjerave, rëndësinë e pranimit të përgjegjësisë në këtë kontekst, përfitimet e arritjes së përmbylljes herët të çështjes në mënyrë të drejtë, dhe mendimet e viktimave”, ka thënë ajo, bëhet e ditur në komunikatë.

Seanca ku do të shqyrtohen marrëveshjet për pranimin e fajësisë do të mbahet nesër (e mërkurë, 18 dhjetor).

“Dy seancat e radhës të mërkurën, më 18 dhjetor 2024, do t’i përqendrohen në trajtimin e Marrëveshjes së Rishikuar për Pranimin e Fajësisë së Shalës, respektivisht Marrëveshjes së Rishikuar për Pranimin e Fajësisë së Januzit”, shkruhet në vendimin e nxjerrë më 13 dhjetor.

Në këtë shkresë gjyqësore thuhet se ata do të pyeten nëse i kanë diskutuar pranimin e fajësisë me mbrojtësit, lidhur me pranimin e elementeve që e përbëjnë marrëveshjen e lidhur me prokurorinë, nëse e kanë lidhur marrëveshjen me vullnet të lirë dhe pa kërcënim apo presion dhe se a e kuptojnë apo jo se me aprovimin e marrëveshjes gjykimi nuk vazhdon si gjykim i rregullt.

“Trupi gjykues do t’ia japë mundësinë z. Shala dhe z. Januzi, nëse dëshirojnë, që të japin deklarata lidhur me marrëveshjen për pranimin e fajësisë, përfshirë këtu çështjen e fajësisë dhe dënimit”, thuhet në vendimin e trupit gjykues të kryesuar nga gjyqtarja Mappie Veldt-Foglia.

Gjyqi ndaj Shalës dhe Januzit, së bashku me Ismet Bahtijarin, ishte planifikuar të hapej më 14 nëntor 2024, por u shty me kërkesë të palëve në këtë çështje gjyqësore. Aktakuza ndaj tyre është ngritur më 4 tetor 2023, me të cilën ngarkoheshin se kanë tentuar të bindnin një dëshmitar të mos japë dëshmi. Ata akuzohen për përpjekje për pengim të personave zyrtarë për kryerjen e detyrës zyrtare, me anë të kërcënimit të rëndë, midis më së paku 5 dhe 12 prillit 2023.

Në këtë vendim thuhet se edhe Bahtijari është marrë vesh me prokurorinë për ta pranuar fajësinë.

Megjithatë, trupi gjykues ka vlerësuar se ajo marrëveshje nuk i përmbush kriteret ligjore.

“Pa paragjykim mbi vendimin e ardhshëm të trupit gjykues të Dhomës së Apelit, nëse ZPS-ja ia lë çështjen Apelit, Trupi gjykues (v.j i Themelores) konstaton se në këtë fazë të procedurës, versioni i rishikuar i marrëveshjes, respektivisht, ndërmjet ZPS-së dhe z. Shala (Marrëveshjes së Rishikuar për Pranimin e Fajësisë së Shalës) dhe ajo ndërmjet ZPS-së dhe Januzit (Marrëveshjes së Rishikuar për Pranimin e Fajësisë së Januzit), përputhen me kriteret e rregullit 94 (2) të Rregullores, për arsyet e përmendura në vendimin për seancën lidhur me pranimin e fajësisë. Ndryshe, trupi gjykues konstaton se versioni i rishikuar i marrëveshjes së ZPS-së me z. Bahtijari (Marrëveshjes së Rishikuar për Pranimin e Fajësisë së Bahtijarit) vazhdon të mos i përmbushë këto kritere”, thuhet në këtë vendim.

Sipas dispozitave ligjore, dënimi për veprën frikësim gjatë procedurës penale mund të jetë nga 2 vjet deri në 10 vjet burgim.