Ministrja e Drejtësisë, Albulena Haxhiu, ka reaguar të martën pas kritikave ndaj saj lidhur me deklaratën se do ta ndjekë penalisht një mërgimtar.
Të hënën, Haxhiu ka shkruar në llogarinë e saj në Facebook, se do ta raportojë në Polici një mërgimtar që kishte ironizuar me një postim që e kishte bërë ajo në Facebook, e në të cilin kishte treguar për një rast të tentim-dhunimit të një 14-vjeçareje.
Haxhiu kishte shkruar se një prind ka lajmëruar në Ministri të Drejtësisë, se në dhjetor të vitit të kaluar vajza e tij 14-vjeçare, ishte viktimë e një tentim-dhunimi. Sipas Haxhiut, prindi ka treguar se ndonëse dihet emri dhe mbiemri i të dyshuarit, ai gjendet në liri.
Ndërkohë me këtë postim ka ironizuar një mërgimtar dhe kjo ka acaruar Haxhiun.
“Personat e tillë që tentojnë të tallen me fëmijët e dhunuar, duhet të ndiqen penalisht dhe qysh nesër do ta raportoj në Polici!”, ka shkruar Haxhiu në Facebook të hënën.
Ky shkrim i Haxhiut ka nxitur shumë reagime në rrjetet sociale, duke e kritikuar atë për pengim të fjalës së lirë.
Ndërkaq, të martën ajo u ka reaguar kritikave, duke thënë se pedofilët dhe ata që i normalizojnë e tallen me ta, nuk dallojnë.
“Pedofilët dhe ata të cilët i normalizojnë e tallen me këto krime nuk dallojnë dhe aq. Relativizimi dhe përqeshja e pedofilisë, vetëm sa do ta rëndojë situatën dhe do t’i shtojë pedofilët e do ta normalizojë këtë krim!”, ka shkruar Haxhiu në Facebook të martën.
Mërgimtari Korab Blakaj, që sipas informatave në Facebook jeton në Austri, ka thënë në një postim tjetër se është tallur me paaftësinë e ministres Haxhiu dhe i ka bërë thirrje asaj të japë dorëheqje.
