Nënkryetari i Lidhjes Demokratike të Kosovës Lutfi Haziri, tha se nëse LDK nuk fiton në Prishtinë me gjithë fitoret e mundshme në qytetet e tjera s’do të kishte rikthim të partisë.
Ai tha në RTV Dukagjini është i bindur se kandidati i kësaj partie për kryetar të Prishtinës, Përparim Rama, do të shkojë në balotazh në kryeqytet.
“LDK ka pasur kuadro në Prishtinë, kuadro aktive dhe shembulli më i mirë është kandidatura e Arban Abrashit i cili për shkak të 200 votave nuk e mbërriti me marrë zyrën e kryetarit të kryeqytetit. Por është mundësi e mirë më kapitalizu rikthimin e madh të LDK-së sepse pa u kthyer në Prishtinë LDK-ja, janë beteja të vogla ato që i fiton”.
“Pse Arban Abrashi si koleg i imi nuk e dëgjoi këshillën time si mik në ditën që është ratifikuar Shpend Ahmeti si kryetar. Unë i kam thënë: “prej sotit ti je kryetari në hije i Prishtinës sepse 200 vota është besim i madh, dhe fillo me ushtruar detyrën e opozitarit të përditshëm dhe fillo me qenë kujdestar i Prishtinës”.
Numri dy i LDK-së mendon se me Përparim Ramën do të shkojë në balotazh në Prishtinë në zgjedhjet e tetorit të këtij viti.
“Në Prishtinë, jam i bindur që kandidati ynë ka me ditë me plasu politikisht rolin e tij dhe mandatin e LDK-së me një garë në balotazh që s’ka me qenë e lehtë”.
