Heqja e flamurit turk në Lalëz, jo domosdo një vepër penale

Lajmi se një 48-vjeçar u arrestua nga policia e Durrësit pasi hoqi me forcë flamurin e Turqisë nga vendi i rojës detare në Gjirin e Lalzit dhe më pas e hodhi në det tërhoqi vëmendjen e mediave.

Policia në orët e para të mesditës bëri me dije se pas disa orësh kërkime u bë i mundur lokalizimi dhe kapja e këtij shtetasi.

Ai u akuzua për veprat penale “Nxitja e urrejtjes ose grindjeve” dhe “Prishja e rendit dhe qetësisë publike”.

Por avokati, Rezart Kthupi, sqaron për Albanian Post se kjo nuk është “drejtpërdrejt” një vepër penale.

Ai sqaron se nëse flamuri turk do të ishte aset i bazës dhe të kishte cenuar tërësinë e bazës detare, kjo do të ishte një vepër penale.

Por duke qenë se Gjiri i Lalzit nuk është një bazë detare, por një zonë publike dhe e komanduar nga pushteti vendor, kjo nuk përbën një shkelje penale.

Nga ana tjetër, mediat turke e kanë cilësuar si një gjest ‘ i ulët’ që duhet dënuar.

I akuzuari gjatë heqjes së flamurit nuk ka bërë asnjë deklaratë që cekte Turqinë apo marrëdhëniet e Shqipërisë me të.

Madje gjatë heqjes së flamurit nuk ka pasur një grisje apo djegie që mund të çonte edhe në një incident ‘të vogël’ diplomatik.