Hera e katërt që e thotë në disa vite, Erdogan: Këto janë zgjedhjet e mia të fundit si udhëheqës i vendit

Recep Tayyip Erdogan tha se zgjedhjet lokale që janë planifikuar të mbahen më 31 mars do të ishin të fundit për të në krye të shtetit turk.

Ai ka udhëhequr vendin për më shumë se dy dekada, raporton reuters.

Një fitues i më shumë se një duzinë zgjedhjesh që nga viti 2002, 70-vjeçari u rizgjodh për një mandat pesë-vjeçar gjatë zgjedhjeve të vitit 2023.

“Kjo është një finale për mua, sipas mandatit të dhënë nga ligji. Këto janë zgjedhjet e fundit për mua”, tha Erdogan.

“Rezultati që do të dalë do të jetë transferimi i një trashëgimie te vëllezërit e motrat e mia që do të vijnë pas meje”, citohet të ketë thënë ai.

Kujtojmë se Erdogan u bë president për herë të dytë në zgjedhjet e mbajtura më 24 qershor 2018, pas kalimit në sistemin e qeverisjes presidenciale. Kandidimi i tij ishte bërë temë debati para zgjedhjeve të vitit të kaluar.

Disa politikanë dhe avokatë argumentuan se Erdogan nuk mund të jetë kandidat për herë të tretë, duke përmendur dispozitën në Kushtetutë që një person “nuk mund të zgjidhet president më shumë se dy herë”.

Nga ana tjetër, krahu qeverisës dhe partneri i koalicionit MHP, deklaroi se nuk ka asnjë pengesë që Erdogan të jetë kandidat në zgjedhjet e vitit 2023, pasi ai u zgjodh president për herë të parë në vitin 2018 sipas sistemit presidencial, ose “President, Sistemi Qeveritar” siç quhet në Turqi, shkruan t24.

Në zgjedhjet e zhvilluara pas këtyre diskutimeve, pasi asnjë kandidat nuk arriti të fitojë në raundin e parë, Erdogan u rizgjodh president në raundin e dytë.

Ndryshe, Erdogan kujtojmë se edhe në katër raste të tjera kishte deklaruar se këto janë zgjedhjet e mia të fundit duke paralajmëruar se do të tërhiqet nga politika.