I amnestuari nga Presidenti, Granit Paqarizi sërish në pranga të policisë

Policia e Kosovës ka arrestuar sot Granit Paçarizin, biznesmenin nga Prizreni, i cili dyshohet ka sulmuar disa persona pas një mosmarrëveshje për pronë.

Sinjali mëson se i njëjti është arrestuar për kanosje dhe lëndim trupor.

Rasti është konfirmuar edhe nga policia e Kosovës.

Vesel Gashi, zëdhënës i policisë për rajonin e Prizrenit për Sinjalin ka thënë se njejti ishte përfshirë në një rrahje fizike.

Sipas Gashit, viktimat kanë marrë tretmanin mjekësor dhe i dyshuari është ndaluar për 48 orë.

“Policia e Kosovës ka arrestuar personin në fjalë për kanosje dhe sulm. I njëjti është dërguar për ndalim policor për 48 orë. Ai është në stacionin policor të Prizrenit pasi që pas një mosmarrëveshje për një kontekst pronësor i njëjti kishte sulmuar disa persona”, tha Gashi.

“Viktimat kanë marrë tretmanin mjekësor ndërkaq në vendin e ngjarjes kanë dalur edhe inspektorët komunalë ndërsa me rastin po merret njësiti i hetimeve rajonale të stacionit policor të Prizrenit”, tha tutje Gashi.

Nuk është hera e parë që biznesmeni prizrenas, Granit Paçarizi, ka telashe me Policinë. Kjo sepse vite më parë, në 2013, ai ishte përfshirë në një përleshje masive, ku si pasojë e përdorimit të armëve të zjarrit, kishte edhe persona të plagosur.

Paçarizi ishte akuzuar për armëmbajtje pa leje, për çka edhe ishte shpallur fajtor. Por, prokurori e kishte rihapur rastin, duke e akuzuar kështu Paçarizin për veprën penale ‘Vrasje e rëndë në tentativë’.

Për kryerjen e kësaj vepre penale, ai ishte dënuar me 2 vite e gjysmë burgim dhe ishte dërguar në vuajtje të dënimit në Qendrën Korrektuese në Smrekonicë.

E më 1 janar të vitit 2020, ish-presidenti i Republikës së Kosovës, Hashim Thaçi, me anë të një dekreti kishte falur një vit burg, tre personave të dënuar për vepra të ndryshme penale ku në këtë falje ishte edhe Granit Paçarizi.