Ia vjedhin veturën në oborrin e shtëpisë, kërkon ndihmën e qytetarëve për ta gjetur

A.J., (emër i njohur për redaksinë) i është vjedhur vetura e tipit “BMW”, në oborrin e shtëpisë së tij, në Graçanicë, në vlerë të 90 mijë eurove.

Pronari i veturës i ka thënë Sinjalit se dikush ka hyrë në shtëpinë e tij ku ka vjedhur çelësat e veturës dhe një çantë me dokumente.

Në çantë ai thotë se kishte: pasaportat, patentë shoferin, letërnjoftimin, librezën e qarkullimit të veturës, policën e sigurimit dhe TPL, si dhe kartelën e vaksinimit.

Lidhur me këtë rast kishte raportuar edhe Policia e Kosovës, në raportin 24-orësh, të cilin e kishte cilësuar si “Vjedhje të rëndë”.

“Graçanicë 16.10.2021 – 03:00. Ankuesi mashkull kosovar ka raportuar se nga persona të panjohur, i është vjedhur vetura e tij me targa vendore. Po ashtu, të njëjtit me forcë kanë depërtuar brenda shtëpisë së tij dhe kanë vjedhur një çantë dore, me dokumente personale dhe një shumë parash. Rasti vazhdon të hetohet”, thuhej në raportin e Policisë.

Mirëpo, edhe pas gati dy muajsh, hetimi i Policisë nuk solli rezultate.