Në të ardhmen, iPhone juaj mund t’ju lajmërojë nëse mund të keni rrezik për të pasur probleme me shikimin.
Së fundmi, Apple ka lëshuar një patentë që tregon se një iPhone mund të përdoret për të dalluar miopinë.
Në të tregohet se pajisja mund të monitorojë largësinë mes saj dhe përdoruesit për t’i treguar nëse duhet të bëjë një vizitë te okulisti dhe ndoshta t’i nevojiten syze.
Risia mund të përdoret edhe për teste në të cilat celulari mund të përshtasë automatikisht madhësinë e shkrimit dhe cilësime të tjera të ekranit për të lehtësuar lodhjen në sy.
Sipas statisikave botërore, mesatarisht njerëzisht shpenzojnë thuajse 7 orë në ditë në ekrane. Ky trend nuk përkon me shikim të shëndetshëm. Një prej shqetësimeve kryesore është se tendenca e përdoruesve është që t’i mbajnë celularët shumë pranë fytyrës, të picërrojnë sytë apo të kenë probleme me shikimin nga afër, por edhe problematika të tjera.
Pajisjet Apple mund të përdorin një ose disa sensorë apo kamerën për të grumbulluar të dhëna fotografike që të dallojnë largësinë mes celularit dhe përdoruesit. Këto të dhëna mund të krahasohen me ato që tregojnë se në çfarë pike përdoruesi mund të pësojë miopi. Nëse pajisja dallon që përdouesi mund të ketë probleme me sytë, e njofton duke i dërguar paralajmërime për shëndetin e syve.
Në dokument theksohet edhe sesi kjo risi mund të përdorë masa për t’i ndaluar përdoruesit që t’i afrojnë shumë pranë fytyrës pajisjet e tyre.
Kjo mund të ndodhë duke zmadhuar gradualisht shkrimin derisa largësia të jetë në parametrat e duhur. Mund edhe të nisë të dridhet që ta lajmërojë përdoruesin të largohet nga ekrani. Në bazë të të dhënave, mund të dërgojë njoftime që informojnë përdoruesit kur u duhet një recetë e re.
Ky mund të jetë një hap për të ndjekur shëndetin e syve, por nuk dihet ende nëse kompania do ta implementojë këtë patentë në të ardhmen.
