Një ish-mercenar i Wagner-it, një grup i afërt me Kremlinin dhe Putinin, thotë se dështimi i ushtrisë ruse për të kapur Kievin ishte i pashmangshëm, sepse ata kurrë nuk ishin përballur me një armik të fuqishëm në vitet e mëparshme.
Marat Gabiduljin mori pjesë në misionet e Wagner-it në emër të Kremlinit në Siri. Ai tani ka vendosur të bëjë publike përvojën e tij luftarake nga grupi Wagner, një kompani private e angazhuar në operacione ushtarake, shkruan Reuters. Ai u largua nga grupi mercenar në vitin 2019, por disa muaj para pushtimit rus ai mori një telefonatë nga një rekrutues që i kërkonte të kthehej në grup dhe të luftonte si mercenar në Ukrainë.
Ai refuzoi pjesërisht sepse e dinte se forcat ruse nuk ishin në gjendje të luftonin edhe pse ata vazhdimisht flisnin për arsenalin e tyre të armëve të reja dhe sukseset në Siri.
“Ata ishin krejtësisht të befasuar që ushtria ukrainase rezistoi ashpër dhe se u përballën me një ushtri të vërtetë”, tha Gabiduljin për dështimin e ushtrisë ruse në Ukrainë.
Gabiduljin thotë se njerëzit me të cilët foli nga pala ruse i thanë atij se ata presin të përballen me ushtarë të dobët kur të sulmojnë Ukrainën, dhe jo me njësi të rregullta të trajnuara mirë.
“Unë u thashë atyre: ‘Djema, ky është një gabim’, thotë ish-mercenari, i cili aktualisht ndodhet në Francë, ku po boton librin e tij mbi përvojat e tij të luftimeve në Wagner.
Zëdhënësi i Kremlinit Dimitrij Peskov thotë se nuk e di se kush është Gabiduljin dhe nëse ka qenë ndonjëherë pjesë e kompanive private ushtarake.
“Shteti, qeveria, Kremlini nuk kanë asnjë lidhje me të”, tha Peskov. Ministria e Mbrojtjes e Rusisë nuk iu përgjigj pyetjes së Reuters për ish-mercenarin.
Gabiduljin dhe ish-kolegët e tij nga Rusia, të cilët luftuan jashtë vendit me urdhër të Putinit, pretendojnë se lufta në Ukrainë po zhvillohet në mënyrë të keqe. Igor Girkin, i cili ndihmoi në udhëheqjen e kryengritjes së armatosur pro-Kremlinit në Ukrainën lindore në vitin 2014, ishte kritik për mënyrën se si po zhvillohet lufta. Personi që qëndron pas kryengritjes së vitit 2014, Alexei Alexandrov, i tha Reuters në mars se pushtimi ishte një gabim.
Gabiduljin mori pjesë në disa nga konfliktet më të përgjakshme siriane në provincën e Deir al-Zor, në Ghouta dhe pranë qytetit antik të Palmyra-s. Ai u plagos rëndë në vitin 2016 kur një granatë shpërtheu pas tij gjatë një përleshjeje në malet afër Latakias.
Gabiduljin kaloi shtatë ditë në koma dhe tre muaj në spital, ku iu nënshtrua një operacioni në njërën veshkë dhe një pjesë të zorrëve. Reuters ka konfirmuar në mënyrë të pavarur se ai ishte në grupin Wagner dhe se ishte gjithashtu në luftime në Siri. Grupet e të drejtave të njeriut dhe qeveria ukrainase akuzojnë luftëtarët e grupit Wagner për kryerjen e krimeve të luftës në Siri dhe Ukrainën lindore nga viti 2014 e tutje. Por Gabiduljin tha se ai kurrë nuk kishte marrë pjesë në tortura të tilla.
Ish-mercenari thotë se lufta kundër Ukrainës është krejtësisht ndryshe nga ajo në Siri.
“Kam parë mjaftueshëm se si ushtria ruse luftoi në Siri. Ajo nuk ishte e përfshirë drejtpërdrejt në luftimet atje. Ushtria nuk ka mësuar se si të luftojë siç duhet,” tha ai.
Megjithëse Gabiduljin e dinte se pushtimi rus i Ukrainës do të pasonte, ai tha se nuk e priste që kjo të ndodhte vërtet.
“Nuk mund ta imagjinoja që Rusia do të bënte luftë kundër Ukrainës”, ka komentuar ai. /tesheshi.com/
