Izraeli pranon gabimet për vrasjet e mjekëve në Gaza

Ushtria izraelite ka pranuar se ushtarët e saj “kanë bërë gabim” lidhur me vrasjen e 15 punonjësve të urgjencës në jug të Gazës më 23 mars, raportoi të dielën BBC-ja.

Autoambulanca e Shoqatës së Gjysmëhënës së Kuqe Palestineze (PRCS), një veturë e OKB-së dhe një kamion zjarrfikës nga Mbrojtja Civile e Gazës u vunë nën zjarr pranë Rafahut.

Izraeli fillimisht pretendoi se trupat kanë shtënë sepse këto automjete janë afruar në mënyrë të dyshimtë pa drita ndezëse dhe pa rënë dakord me ushtrinë paraprakisht.

Ndërsa pamjet që u gjetën në telefonin e një prej ndihmësve që është vrarë, treguan se automjetet kanë pasur dritat e ndezura teksa po iu përgjigjnin një thirrjeje për të ndihmuar të plagosurit.

Forcat e Mbrojtjes së Izraelit (IDF) këmbëngulin se të paktën gjashtë nga mjekët kanë pasur lidhje me Hamasin ndonëse deri tani nuk kanë ofruar asnjë provë.

Gjithashtu forcat izraelite kanë pranuar se mjekët ishin të paarmatosur kur ushtarët kanë qëlluar drejt tyre.

Në fillim të kësaj jave, një mjek i mbijetuar ka thënë për BBC-në se ambulancat i kishin dritat të ndezura dhe mohoi që kolegët e tij të kenë pasur lidhje me Hamasin.

Gjysmëhëna e Kuqe dhe shumë organizata të tjera ndërkombëtare po bëjnë thirrje për hetim të pavarur.