Ish-zëvendësministri i Jashtëm, Anton Berisha, ka kritikuar kryeministrin e Malit të Zi, Dritan Abazoviq, për marrëveshjen që nënshkroi sot me Kishën Ortodokse Serbe, për të cilën tha se nuk e njeh shtetin e Kosovës, e as vetë kombin malazez.
Për këtë të fundit, Berisha tha se iu gjend Kosovës në kohë të vështira, derisa për Abazoviqin tha se u bë kryeministri i parë i Malit të zi që po godet traditën e shtetit.
“I maskuar nën petkun e orientimit qytetar, e ndërton URË me Kishën Ortodokse Serbe, që pa hyrë në detaje tjera, nuk e njeh Malin e Zi si shtet, nuk e njeh kombin malazez ashtu siç nuk e njeh as shtetin e Kosovës. Ky mashtrues, ashtu sikurse edhe prototipi i tij Kurti në Kosovë që përmes parullave antikorrupsion e qeverisje të mirë e marifeteve të tjera erdhën në pushtet, në fakt është bërë kryeministri i parë i Malit të Zi që e godet në traditë shtetin që përkrahu shqiptarët gjatë luftës në vitet ‘98-99 dhe që, në rrethana të ndërlikuara, njohu Kosovën si shtet të pavarur”, ka shkruar Berisha.
Ai tha se është plotësisht pro iniciativës së presidentit malazez Milo Gjukanoviq për rrëzimin “e të ashtuquajturit shqiptar Abazoviq”, për të cilin shtoi se nga pozita e kryeministrit qartazi shfrytëzoi pozitën për realizimin e interesave serbomëdha duke e goditur me thikë pas shpine shtetin e vet.
“Për fat të keq në këta shekuj kemi pasur me bollëk kryevezira të këtij lloji”.
