IDF lëshoi një deklaratë duke e bërë të qartë se nuk synon spitalet, dy orë pas një shpërthimi në Spitalin e Gazës, për të cilin Hamasi fajësoi Izraelin, që thuhet se ka shkaktuar qindra viktima.
Pamjet e kaosit në spitalin al-Ahli në qytetin e Gazës po qarkullojnë në mbarë botën. Reuters raporton deklaratat e zyrtarëve palestinezë të cilët pretendojnë se më shumë se 500 njerëz vdiqën si rezultat i bombardimeve izraelite të spitalit dhe se shumë të tjerë thuhet se janë nën rrënoja.
Nebal Farsakh , një përfaqësues i Shoqatës Palestineze të Gjysmëhënës së Kuqe, tha se shumë nga ata që u mblodhën në Spitalin Arab al-Ahli në qytetin e Gazës iu bindën kërkesës së Izraelit për t’u evakuuar, por nuk mund të udhëtonin në jug.
“Shumë njerëz pyesin pse ky numër është kaq i lartë. Kjo pasi këta janë palestinezë që kërkuan strehim para spitalit. Ata menduan se do të ishin në një vend më të sigurt jashtë spitalit. Por ky nuk është rasti në Gaza, nuk është rasti në Palestinë”, tha ajo në një deklaratë për Al Jazeera.
Ziad Shehadah, një mjek dhe banor i Gazës, i tha Al Jazeera nga Rripi i Gazës: “Numri i të vdekurve aktualisht është më shumë se 500, por ne besojmë se numri do të arrijë më shumë se 1,000. Është një masakër.”
Pasi një zëdhënës i ushtrisë izraelite pretendoi se nuk kishte detaje rreth vdekjeve në spitalin al-Ahli, tani po dalin informacionet e para nga IDF.
Gjegjësisht, izraelitët pretendojnë se është kryer një hetim urgjent dhe siç ka mësuar i24 News, reagimi zyrtar i ushtrisë izraelite është se askush nga radhët e tyre nuk ka marrë pjesë në këtë bombardim të tmerrshëm.
“Shpërthimi në spitalin e Gazës u shkaktua nga një lëshim i pasuksesshëm i një rakete të Hamasit”, pohojnë ata.
