Jasharaj: Qeveria po i kërcënon komunat që ta ndërpresin grevën

Kryetari i Sindikatës së Bashkuar të Arsimit, Shkencës dhe Kulturës, Rrahman Jasharaj, deklaroi se Qeveria Kurti po iu bënë presion e po i kërcënon komunat që ta ndërpresin grevën e mësimdhënësve.

Ai tha për KOHËN të dielën se tensionet dhe kërcënimet e Qeverisë janë veprime negative, që sipas tij, dëmtojnë grevën dhe iu krijojnë konfuzione prindërve.

“Po krijohen presione dhe tensione. Greva vazhdon deri në plotësimin e kërkesave. Qeveria nëpërmjet formave të ndryshme po bën presion dhe kjo nuk duhet të ndodhë pasi mund të krijojë tensione dhe konfuzione mes prindërve dhe mësimdhënësve”, tha Jasharaj, duke theksuar se sikur ndaj ministrit të Financave, Hekuran Murati, padi mund të ngrihet edhe ndaj zyrtarëve të tjerë të Qeverisë për kërcënim.

Njoftimin e Komunës së Podujevës se disa shkolla në këtë qytet do ta nisin procesin mësimor të hënën (5 shtator), Jasharaj e quajti të nxitur nga pushteti.

Ai theksoi se gjatë së dielës SBASHK-u do të mbajë takim online me përfaqësuesit e komunave për të parë mbarëvajtjen e grevës.

Shkollat “Xheladin Rekalu”, “Fan S.Noli” dhe Gjimnazi “A.Xhuvani” në Podujevë, bënë të ditur nëpërmjet Facebookut të dielën për ndërprerjen e grevës.

“Konsiderojmë qe vendimi i djeshëm i Qeverisë ka krijuar rrethana të reja në të cilat duhet të reflektojmë pozitivisht të gjithë dhe të minimizojmë humbjet që shkaktohen nga greva për nxënësit, të cilët edhe ashtu janë prekur nga humbjet të cilat u shkaktuan në dy vitet e fundit nga pandemia me virusin Covid-19”, thuhet në njoftim.