Jordania arreston 16 persona të “Vëllazërisë Myslimane”, planifikonin sulm ndaj mbretërisë

Jordania tha të martën se kishte arrestuar 16 persona të lidhur me “Vëllazërinë Myslimane”, të cilët ishin trajnuar dhe financuar në Liban dhe kishin planifikuar sulme ndaj objektivave brenda mbretërisë, përfshirë raketa dhe dron.

Autoritetet thanë se të paktën një raketë ishte gati për t’u lëshuar si pjesë e një operacioni që ishte nën vëzhgim nga forcat e sigurisë që nga viti 2021.

“Vëllazëria Myslimane“, një nga lëvizjet islamike më të vjetra dhe më me ndikim në botën arabe, në një deklaratë dërguar Reuters mohoi çdo lidhje me komplotin në fjalë, duke thënë se se grupi kishte ndjekur gjithmonë një kurs politik paqësor dhe se dega e Vëllazërisë në Jordani kishte funksionuar legalisht për dekada, përcjell Insajderi.

Forcat e sigurisë gjetën një fabrikë të prodhimit të raketave pranë një fabrike dronësh, sipas një deklarate të Departamentit të Përgjithshëm të Inteligjencës të publikuar në mediat shtetërore.

Komploti kishte për qëllim dëmtimin e sigurisë kombëtare, mbjelljen e kaosit dhe shkaktimin e shkatërrimit material brenda mbretërisë, thuhet në deklaratë.

Të dyshuarit janë dërguar për gjykim në Gjykatën e Sigurimit të Shtetit.