“Kam dy fëmijë me ish-gruan, më pas u martova me një burrë” – ambasadori i BE në Shqipëri flet hapur për orientimin seksual

Ambasadori i Bashkimit Europian në Shqipëri, Silvio Gonzato, ka folur hapur për orientimin e tij seksual dhe përkushtimin ndaj mbrojtjes së diversitetit dhe të drejtave të individëve.

Gonzato potencoi rëndësinë e ndershmërisë dhe vetëpranimit, edhe kur kjo mund të të ekspozojë ndaj paragjykimeve.

“Është e vështirë sot të ekspozohesh në këtë formë dhe bëhesh i cenueshëm, por më pëlqen të jem i sinqertë. Nuk kam diçka për të fshehur. Të shprehesh se kush je në të vërtetë nuk është e lehtë, por është e rëndësishme të jesh i ndershëm,” tha ambasadori në një intervistë për emisionin “Dita Jonë” në A2 CNN.

Ai u shpreh se ndjenjat dhe përjetimet e njerëzve janë universale, pavarësisht orientimit apo identitetit të tyre.

“Mënyra si jam unë nuk është kërcënim për ju dhe ndjenjat që kam janë të njëjta me ju. Po, ne jemi ndryshe, por edhe të njëjtë,” u shpreh Gonzato.

Ambasadori ndau edhe detaje personale nga jeta e tij, duke treguar se më parë ka qenë i martuar me një grua dhe më pas me një burrë, duke theksuar se sfidat dhe problemet në marrëdhënie janë të njëjta, pavarësisht përkatësisë gjinore të partnerit.

“Kam qenë i martuar me një femër dhe më pas u martova me një burrë. Problemet janë njësoj,” shtoi ai.