Kamioni përplas ambulancën, vdes pacienti që po transportohej

Një aksident i rëndë ka ndodhur në aksin Fier-Lushnje, në vendin e quajtur “Rotondo e Savrës”. Një kamion është përplasur me një ambulancë dhe si pasojë e përplasjes së fortë ka ndërruar jetë pacienti që po transportohej.

Ndërkohë, të lënduar kanë mbetur drejtuesi i ambulancës, infermierja dhe vajza që po shoqëronte të atin e sëmurë 77-vjeçar në ambulancë.

Në vendngjarje kanë shkuar menjëherë policia dhe grupi hetimor për të zbardhur dinamikën e këtij aksidenti të rëndë.

Njoftimi i policisë:

Rreth orës 14:50, në aksin rrugor “Lushnjë-Fier”, në vendin e quajtur “Rotondo e Savrës” ka ndodhur një aksident rrugor ku janë përplasur automjeti tip “Kamion” me drejtues shtetasin L. Gj. 31 vjeç, dhe autombulanca me drejtues shtetasin F. R., 54 vjeç, në të cilën ndodhej pacienti D. K., 77 vjeç, i cili ka ndërruar jetë.

Gjithashtu, janë dëmtuar dhe ndodhen në spital, në kujdesin e mjekëve, drejtuesi i autombulancës, infermieri, shtetasi E. B., 33 vjeç dhe vajza e pacientit që ndërroi jetë, shtetasja E. A., 37 vjeçe.

Grupi hetimor ndodhet në vendngjarje dhe nën drejtimin e Prokurorit po vijon veprimet për përcaktimin e shkakut të aksidentit si edhe po kryen veprimet procedurale me 2 drejtuesit e automjeteve.