Deklaratat e ministrit të Mbrojtjes së Serbisë, Millosh Vuçeviq, të mbushura me shantazhe dhe kërcënime ndaj 2 vendeve anëtare të NATO-s, Maqedonisë së Veriut dhe Malit të Zi, janë kritikuar ashpër nga nivelet më të larta politike të këtyre dy vendeve.
Presidenti i Malit të Zi, Jakov Milatoviç, nëpërmjet një postimi në rrjetin social X (Twitter) deklaroi se është e papranueshme çdo përpjekje për të ndërhyrë drejtpërdrejt ose indirekt me aktorët e huaj, nga rajoni apo pjesa tjetër e botës, në krijimin e Qeverisë në Mal të Zi.
Sipas tij, mbledhja e 28-të e Kuvendit është pasqyrë e vullnetit të qytetarëve të Malit të Zi, të cilët, sipas Kushtetutës, “janë bartës të sovranitetit“.
“Pres që formimi i Qeverisë së 44-të të bazohet në vullnetin e shprehur lirshëm të qytetarëve në zgjedhjet e kaluara parlamentare, si dhe në prioritetet programore që do të mundësojnë anëtarësimin e përshpejtuar të Malit të Zi në BE, rritjen e standardit jetësor dhe ndërtimi i shtetit të së drejtës”,- shkroi Milatoviç.
Edhe Maqedonia e Veriut ka reaguar ndaj ministrit serb, pas kërcënimeve ndaj vendeve të rajonit për shkak të njohjes së Kosovës. Shefi i diplomacisë maqedonase, Bujar Osmani, i ka cilësuar si të papërshtatshme komentet.
”Maqedonia e Veriut refuzon ndërhyrjen dhe vërejtjet e papërshtatshme nga zyrtarët fqinjë. Ne qëndrojmë për stabilitet dhe bashkëpunim rajonal, duke përfshirë Serbinë dhe Kosovën. Në pritje të sqarimit nga ministri i Mbrojtjes i Serbisë”,- shkroi ai në X (Twitter).
Lidhur me deklaratat e ministrit serb është shprehur edhe kryeministri, Edi Rama, i cili i cilësoi ato “të rrezikshme dhe të papranueshme”.
Nëpërmjet një postimi në X, Rama shkroi se kërcënimet kundër stabilitetit dhe integritetit të Maqedonisë së Veriut dhe Malit të Zi janë të rrezikshme dhe të papranueshme.
“Të mos harrojmë se Shqipëria, Maqedonia e Veriut dhe Mali i Zi janë aleatë të NATO-s plotësisht të përkushtuar ndaj sigurisë dhe integritetit territorial të njëri-tjetrit. Ne kemi arritur në dekadën e fundit në këtë rajon atë që askush nuk mund ta imagjinonte në dekada të pafundme më parë dhe nuk mund dhe nuk do të lejojmë askënd të na tërheqë prapa në të shkuarën që po e lëmë pas përgjithmonë! Së bashku! Evropa e Madhe është e ardhmja jonë e vetme.“- shkroi Rama.
