Kina sulmon ashpër tre vende për nëndetëset bërthamore: “Ju po ecni në një rrugë të rrezikshme”

Pasi Shtetet e Bashkuara të Amerikës, Australia dhe Britania e Madhe zbuluan të hënën se Australia do të pajiset me nëndetëse sulmi me energji bërthamore në fillim të dekadës së ardhshme , Kina tha se të tre vendet “vazhduan të ecnin në një rrugë të rrezikshme”, raporton Sky News.

Zëdhënësi i Ministrisë së Jashtme kineze Wang Wenbin tha se SHBA, Australia dhe Britania e Madhe kanë injoruar shqetësimet e komunitetit ndërkombëtar.

Presidenti i SHBA Joe Biden tha të hënën se Uashingtoni, Kanberra dhe Londra janë të përkushtuara për një Indo-Paqësor të lirë dhe të hapur. Kryeministri britanik Rishi Sunak tha se do të ishte hera e parë që tre flotat e nëndetëseve do të bashkëpunojnë në Atlantik dhe Paqësor.

Sipas marrëveshjes, SHBA do t’i shesë Australisë tre nëndetëse amerikane të klasit Virginia me energji bërthamore në fillim të viteve 2030, me opsionin që Australia të blejë dy të tjera nëse është e nevojshme, thuhet në deklaratën e përbashkët.

Ai tha se projekti do të arrinte kulmin me prodhimin britanik dhe australian të një klase të re nëndetësesh, SSN-AUKUS – një anije “e zhvilluar në mënyrë trepalëshe” e bazuar në një dizajn britanik të gjeneratës së ardhshme që do të ndërtohej në MB dhe Australi me eknologjitë me më të avancuara amerikane.

Mbretëria e Bashkuar do të marrë nëndetësen e saj të parë SSN-AUKUS në fund të viteve 2030 dhe Australia do ta marrë nëndetësen në fillim të viteve 2040.

SHBA, Australia dhe Britania e Madhe përfunduan paktin e sigurisë ushtarake AUKUS në mesin e shtatorit 2021. Pakti u bë me synimin e Australisë, e cila ka rezerva të mëdha uraniumi, duke ndërtuar një flotë të re nëndetësesh bërthamore me ndihmën e SHBA-së dhe Britanisë. Qëllimi përfundimtar i AUKUS është të rrisë praninë e fuqive perëndimore në Paqësor.

Si pjesë e AUKUS, Uashingtoni po ndan teknologjinë bërthamore për herë të parë që nga vitet 1950 kur ajo u nda me Britaninë e Madhe.

Të hënën, Biden theksoi se këto janë nëndetëse me energji bërthamore, por se ato nuk janë të armatosura me armë bërthamore. “Këto anije nuk do të kenë armë bërthamore të asnjë lloji në to,” tha ai.

Kina e ka dënuar AUKUS-in si përhapje të paligjshme bërthamore.