Kongresistja demokrate Melanie Stansbury nga New Mexico mbajti një letër ku shkruhej “Kjo nuk është normale” derisa presidenti amerikan Donald Trump përshëndeti ligjvënësit duke hyrë para se të mbante fjalimin e tij në një seancë të përbashkët të Kongresit.
Por, më pas republikani Lance Gooden nga Teksasi i hoqi shenjën nga duart Stansburyt, shkruan CNN.
Trump më 4 mars mbajti një fjalim para Kongresit ku ndër të tjera tha se Ukraina është gati të fillojë negociatat e paqes “sa më shpejt të jetë e mundur”, me sinjale të forta se Rusia është gjithashtu gati për një marrëveshje.
Gjatë fjalimit, presidenti amerikan lexoi me zë të lartë një letër që tha se kishte marrë nga presidenti i Ukrainës Volodymyr Zelensky.
“E vlerësoj që ai e dërgoi këtë letër”, tha Trump.
Toni i Trump krijoi një përshtypje për një ftohje të mundshme të ashpërsisë midis dy liderëve që u pa në takimin në Shtëpinë e Bardhë.
