Komandanti i KFOR-it: Po të mos intervenonim në veri, tani do të vajtonim për të vdekurit

Komandanti i KFOR-it, Angelo Michelle Ristuccia, në një intervistë për gazetën italiane “La Repubblica” thotë se në Zveçan ka pasur njerëz të cilët “me qëllim e kanë nxitur turmën” e banorëve serbë të cilët janë mbledhur prej katër ditësh para objektit komunal.

Ndërkohë ai ka vënë theksin te rëndësia e pranisë së KFOR-it në komunat veriore të Kosovës, duke thënë se po të mos ishte misioni gjërat do të kishin shkuar shumë më keq.

“Nëse nuk do të kishim ndërhyrë, tani do të ishim duke mbajtur zi për të vdekurit”, e ka përshkruar Ristuccia situatën që do të mund të përshkallëzonte më tej pa praninë e KFOR-it.

Më 26 maj në Leposaviq, Zveçan e Zubin Potok qytetarët serbë kanë protestuar duke kundërshtuar hyrjen e kryetarëve të rinj në objektet komunale. Protestat kanë vazhduar me dhunë nga protestuesit të cilët përveç automjeteve që dëmtuan, kanë lënduar e plagosur ushtarë të KFOR-it e pjesëtarë të Policisë së Kosovës.

700 trupa shtesë të NATO-s do të dislokohen në Kosovë, ndërsa ka shprehur gatishmërinë për trupa të tjerë në rast nevoje.