Konfirmohet nga Policia: Një qytetarit në veri iu dogjën tri vetura, nuk ishin me targa RKS

Policia e Kosovës ka konfirmuar se edhe tri vetura të tjera janë djegur në veri të vendit.

Zëdhënësi i Policisë së Kosovës, Bajram Krasniqi për Metron e ka konfirmuar se një qytetar i nacionalitetit serb nga Leshaku i Leposaviqit, ka raportuar në ora 03:10 se tri veturat e tij janë përfshirë nga zjarri.Sipas Policisë veturat nuk ishin të regjistruara me targa të ligjshme të Kosovës.

“Në ora 03:10, policia është njoftuar nga një qytetar serb kosovar, se në Leshak të Leposaviqit, tri vetura të tij (nuk janë me targa RKS), janë përfshirë nga zjarri. Policia ka dalë në vend-ngjarje dhe ka iniciuar rastin ‘zjarrvënie’ të cilin është duke e trajtuar”, tha Krasniqi për Metron.

Sot shefi i stafit të Presidentes Vjosa Osmani, Blerim Vela, tha se edhe tri vetura të tjera janë djegur në veri të vendit, herët në mëngjes.

Vela në Twitter ka thënë se po targetohen qytetarët për të cilët Serbia po konsideron se po bashkëpunojnë me institucionet e Kosovës.

“Vazhdon fushata kriminale e djegies së veturave në veri të Kosovës! Tre makina të tjera janë djegur sot herët në mëngjes. Strukturat ilegale të Serbisë tani po targetojnë serbët lokalë që ata konsiderojnë se po bashkëpunojnë me institucionet e Kosovës. Çdo autor do të dalë para drejtësisë!”, ka shkruar Vela.

Ditë më parë janë djegur tetë vetura në veri, shumica të riregjistruara me tabela RKS (Republika e Kosovës).