Konjufca: S’jam optimist se marrëveshja përfundimtare me Serbinë arrihet pa u prekur Kushtetuta e Kosovës

Kryetari i Kuvendit të Kosovës, Glauk Konjufca, ka folur mbi detajet e takimit të sotëm me Emisarin e Posaçëm të BE-së për dialogun Kosovë-Serbi Miroslav Lajçak.

Konjufca, në Rubikon të Klan Kosovës, tha se nga Lajçaku ka kërkuar që të mos ketë bisedime për pavarësinë dhe territorin e vendit pasi, sipas tij, Emisari i BE-së në të kaluarën ka dhënë deklarata të cilat e kanë dëmtuar interesin e Kosovës.

“Këtë duhet t’ia thotë çdo zyrtar shtetëror i Republikës së Kosovës Miroslav Lajçakut, për shkak se kur e mori mandatin për të qenë njeriu kryesor i mandatuar nga Bashkimi Evropian për ta udhëhequr pozicionin dhe përgjegjësinë e ndërmjetësit kryesor në dialogun Kosovë- Serbi [Miroslav] Lajçak i pati disa deklarata të cilat mendoj se e kanë dëmtuar interesin e Republikës së Kosovës”.

Ai tha se deklaratat e Emisarit të BE-së, si ajo për mundësinë e prekjes së Kushtetutës së Kosovës, janë të rrezikshme për vendin.

“Deklarata të cilat nënkuptonin disa mesazhe që ai i lëshonte në drejtim të kornizës së marrëveshjes e cila, sipas tij, nuk e përjashton edhe mundësinë e prekjes së Kushtetutës së Kosovës. Kjo ma merr mendja që është shumë e dëmshme. Edhe kryeministri, presidentja dhe zyrtarë të tjerë, zëvendëskryeministri Bislimi për shembull i cili po udhëheq ekipet e dialogimit të Kosovës me Serbinë, ia kanë bërë të qartë [Miroslav] Lajçakut që kjo qasje nuk është e mirëpritur në Kosovë. Nëse insistohet që zgjidhja përfundimtare me Serbinë do ta ketë formën e ndryshimit të vetë Kosovës nga aspekti institucional kushtetues për neve kjo është shumë e rrezikshme. Është një qasje e cila në fund rezulton me cenimin e rendit juridiko-kushtetues të Republikës së Kosovës, por gjithmonë në favor të Serbisë”.

Kryetari i Kuvendit shtoi se duke pasë parasysh pushtetin në Serbi nuk beson se mund të arrihet marrëveshje përfundimtare Kosovë-Serbi pa u prekur Kushtetuta e Kosovës.

“Unë mendoj se kjo [marrëveshje përfundimtare pa u prekur Kushtetuta e Kosovës] do të ishte opsioni më i mirë për Kosovën, por nuk jam shumë optimist që kjo do të arrihet. Përse nuk jam optimist? Pesimizmi im ka të bëjë me përmbajtjen e pushtetit në Serbi, çfarë natyre ka qeveria e Serbisë dhe le të themi koalicioni qeverisës atje, pra ai dominohet totalisht nga një forcë politike e cila rrënjët e saj politiko-ideologjike i ka në hegjemonizmin serb i cili ndoshta në momente të caktuara historike e ka përjetuar ndonjë modifikim dytësor, por orientimin esencial që një shekull e gjysmë, së paku prej Kongresit të Berlinit, e ka të njëjtë për të realizuar atë që e tha [Aleksandar] Vulini e të cilin e mbështeti [Aleksandar] Vuçiqi para rreth një muaji – krijimin e botës serbe. Kjo i bie politikisht përfshirja e çdo serbi brenda një shteti serb që i bie së paku shkatërrimi i Malit të Zi si shtet, Kosovës si shtet dhe Bosnjes si shtet”.