Një banor nga Janjeva e Lipjanit po e akuzon Qendrën për Punë Sociale në këtë komunë se padrejtësisht ia mori fëmijët, për t’i dërguar në strehimore, shkaku i telasheve psikike të nënës së tyre, ndonëse ai vetë është në gjendje të mirë. Kryefamiljari ka kërkuar t’i kthehen fëmijët, pasi është i aftë dhe mund të kujdeset për ta.
Të ndihmuar nga Policia, punonjës socialë në Lipjan i morën katër fëmijët e kësaj familjeje, derisa i pesti u arratis.
Teksa rrëfen për ngjarjet e dy jave më parë, kryefamiljari Vllaznim Pacolli, thotë se QPS-ja si arsye përmendi gjendjen mendore të nënës së fëmijëve, që kishte qenë e shtrirë, e më pas ishte liruar nga Psikiatria.
Shton se me gjithë vështirësitë ekonomike, ai do të mund të përkujdesej vetë për fëmijët.
“Katër fëmijët vetë i kam pasur në shtëpi me gruan, janë ardhur ata mi kanë marrë fëmijët. Unë ika me djalin e madh në kodër, por prapë po na kërkojnë qe një javë…. Veç këta fëmijë po i du, katër fëmijë që mi kanë marrë, ma shumë s’du”, ka thënë Vllaznim Pacolli.
Tregon se kishte qenë në QPS për t’i kërkuar fëmijët, porse kishte qenë e kot.
“Fëmijët hiç, 18 vjet, pa i bo 18 vjet nuk t’i lëshojmë. Djalin e madh po e lypin”.
Në gjendje të rëndë thotë se është edhe fëmija i arratisur, që i ka nëntë vjet.
“Mbrëmë kemi shkuar te një shok kemi fjetur aty deri vonë, sepse Policia më erdhën në ora nëntë dhe më thanë që ta sjelli djalin e madh në stacion. Unë ika, kemi shkuar te një shok kemi fjetur deri në mëngjes deri kah 7 a 8. Kur jemi ardhur kanë trokitur në derë dhe unë nuk jam dalë hiç”, ka rrëfyer ai.
Asociacioni për të Drejtat e Njeriut në Lipjan ka kërkuar përgjegjësi institucionale, pas vizitës që i kanë bërë kësaj familjeje.
“Institucionet e nivelit nacional dhe atyre lokal, kanë vepruar dhe i kanë marrë fëmijët nën përkujdesje, por te fëmijët e tjerë kanë shkaktuar shqetësim dhe si pasojë e këtij veprimi një fëmijë ka marrë traumë dhe është larguar nga shtëpia dhe ka vështirësi të kthehet. Kërkojmë nga institucionet e nivelit lokal dhe atij qendror të angazhohen sa më shumë”, ka thënë Bekim Krasniqi nga “YAHR”.
Kjo nuk është hera e parë që kësaj familjeje i merren fëmijët.
“Edhe një herë në fund të gushtit apo në fillim të shtatorit ia kanë marrë fëmijët, ia kanë marrë një muaj e gjysmë dhe i kanë kthyer prapë. Tash sërish ia kanë marrë”, ka thënë Gani Avdyli, drejtor i shkollës “Shtjefën Gjeçovi” në Janjevë”.
E përfaqësuesi i fshatit, Behxhet Kongjeli, tregon se kjo familje i ka kushtet e rënda ekonomike, megjithëse banorët e ndihmojnë atë.
“Edhe qytetarët e Janjevës që jetojnë në mërgim në Angli dhe Gjermani, ia kanë blerë shtëpinë para dhjetë vjetësh aty ku e kanë strehuar, mirëpo gjendja ekonomike e ka bërë të veten, andaj kanë probleme familjare dhe sigurisht edhe shoqja ka qenë në gjendje të mirë, por kushtet ekonomike e kanë bërë të veten”, ka thënë ai.
Policia e Kosovës prej dy ditësh nuk u është përgjigjur pyetjeve lidhur me këtë çështje.
Ndërkaq, drejtoresha e Qendrës për Punë Sociale në Lipjan, Makfirete Shamolli, nuk ka dashur të japë detaje rreth këtij rasti, me gjithë insistimin e KOHËS.
Nëpërmjet një përgjigje të shkurtër me shkrim, ajo ka thënë se QPS-ja në bazë të mandatit të saj vepron në interesin më të mirë të fëmijëve dhe familjes, për të shmangur çfarëdo lloj neglizhence dhe rreziku të përmbushjes së detyrave prindërore e në raste të tilla ndërmerr të gjitha masat.
“Të dhënat e mirëbesueshme të mbrojtura me Ligj në raste te tilla kërkojnë përgjegjshmëri institucionale dhe nga partnerët të cilët shprehin interes të informacionit të veprojnë me përgjegjshmëri në respektimin e dinjitetit personal dhe familjar i cilitdo rast që është në nevojë dhe merr shërbime të përkujdesjes ndaj fëmijëve”, ka shtuar Shamolli.
